Vawk thite phûmna tur lâih a ni

Animal Husbandry & Veterinary (AH&Vety) department leh Aizawl Municipal Corporation (AMC) chuan nimin khan Hualngohmuna AMC ramah Aizawla African Swine Fever (ASF) vanga vawk thite phûmna tur an lâi. Kar hmasa khan Tuiriala AMC ramah vawk thite phûmna tur buatsaih a ni tawh bawk.

AMC huam chhunga veng pathum - Armed Veng, Edenthar Veng leh Bawngkawnte chu ASF lênna infected area-ah puan a ni tawh a; veng pathumah hian ASF vangin vawk 245 a thi tawh. Hetih lai hian, Aizawl khawpui chhung, infected area ni lo veng 16-ah chhan hriat lohin vawk 155 a thi tawh.

March 21, 2021 aṭanga nimin thleng khan Mizoram pumah ASF vangin vawk 1,506 a thi tawh a, infected area-a puan ni lo khua/veng 34-ah chhan hriat lohin vawk 435 a thi tawh a ni.