Kar khat chhung khauh zawka Inkhuahkhirh zui leh ṭha tih a ni Kan dinhmun a ṭha lo- Health Minister

Nimina Health minister Dr R Lalthangliana hoa Taxation department conference hall-a sorkar hotute leh pawl ṭhenkhat hruaitute ṭhukhawm chuan, Covid-19 darh zau zel avangin  chawlh karkhat chhung inkhuahkhirhna kalpui mek pawhsei a, khauh lehzuala inkhuahkhirh ṭha an ti.

Inkhuahkhirhna pawhsei tura inkaihhruaina tur chu State Disaster Management Authority (SDMA) hnuaia State Executive Committee (SEC) duan tura dah a ni. Tuna inkaihhruaina kalpui mek hi May 3 zing dar 4 ah a tawp dawn. Health Minister chuan, hripui léng mekah ram dinhmun a ṭhat loh thu sawiin, "India ram pum a ṭha lo. Darkar 24 chhungin thi thar mi 3,501 an tling. Mizoramah pawh kiam lam aiin san lam a pan a, thi zat pawh an pung.

Hripui vei an pung zel a, an awmna turah harsatna kan tâwk ṭan. Hetiang zel a nih chuan kan buai zual zel ang. Hei hi kan rilru tihahtu ber pakhat a ni," a ti. Dr R Lalthanglian chuan, tun dinhmunah Mizoramah oxygen leh ventilator-ah thlaphànna tur a awm lo tih sawiin, "FK Oxygen Plant-in May chhung zawng ZMC-ah oxygen mamawhte a thlâwnin an pe dawn," a ti a; FK Oxygen chuan Delhi-a Mizote  hman tur oxygen ṭhahnem tak an thawn dawn thu a sawi.

Ṭhutkhawma tarlan danin, Mizoram puma Covid-19 veite dahna Covid care centre (CCC)-ah mi 1,470 dah theih a ni a, chu'ngah chuan mi 875 an awm mek. Aizawl bika CCC-ah mi 801 an awm theia ngaih ni mah se, thawktu leh awmpuitu neih ngei ngei ngaite awmna tur a ngaih avangin positive 801 dah theih a ni lo. Aizawla CCC hrang hrangah mi 616 an awm mek.

Swab sample la khawmtu leh screening point-a thawkte harsatna tawh lian ber chu indaih lohna a ni a; an indaih loh em avangin tih ngaihna an hre tawh lo a, an rilru a buai tawh hle a ni. CCC leh khung hran ngaite awmna tur hmun indaih lohna a nasa tawh a, chu vang chuan community covid care centre (CCCC) siam belh a ṭul thu an sawi a; CCCC siamna tur bakah, CCCC-te a ṭul anga vil a, an mamawh leh harsatnate enpui zung zung tur committee din a ni dawn.

Meeting-ah hian Home minister Lalchamliana, Covid-19 Medical Operational Team chairman Dr ZR Thiamsanga leh member te, Chief Secretary, Health Secretary, Mizoram Kohhran Hruaitute Committee leh Aizawl City Area Local Council Association aiawhte an tel a ni.