Governor-in páwl hruaitute a kâwm
Governor PS Sreedharan Pillai chuan nimin khan Raj Bhavanah Mizoram Kohhran Hruaitute Committee (MKHC), Joint NGO Coordination Committee leh ExServices League hruaitute a kâwm a, Covid-19 dona chungchang a sawipui. Larsap hi Health minister
Dr R Lalthangliana'n a ṭawiawm. Sreedharan Pillai chuan, India ram dinhmun a ṭhat loh avangin Vice President leh Prime Ministerte'n governor-te chu state sorkar hmalaknate a chak zawk theih nan a ṭul anga state mamawh awm theite hre chiang a, sorkar laipuia thlen ṭhin tur te, mipui zirtirna kawngah kohhran leh khawtlang hruaitute nasa zawka thawhpui tura thurâwn an pek thute a sawi.
Governor chuan, "Covid-19 thawh khatnaah Mizoram chu kohhran mite leh tlawmngai páwlte thlàwpna bakah, mipui thuawihna zarah state him ber pawl kan ni," a ti a; hripui léng laka himna chungchang inzirtirnaah nasa zawka ṭan la tur leh sorkar thláwpa inhawng chhunzawm turin a ngen. Covid-19 thawh hnihna avangin hripui veite a ni tèlin an pung tih sawiin Larsap chuan, "Tun hun hi fi mkhurna inzirtir uar hun a ni.
Hmalak ṭhatin rah ṭha a chhuah dawn a, Mizoram mipui him leh him loah mi tinte'n mawhphurhna kan nei a ni," a ti. Health minister Dr R Lalthangliana chuan, Covid-19 donaah Mizoram sorkarin chàwl loin thla 16 chuang hma a la tawh tih sawiin, "Hripui donaah kohhran mipui
leh hruaitu te, YMA leh tlawmngai pawl hrang hrangte leh tualchhung leh khaw chhunga LC leh VC-te chungah sorkar a lawm tak zet a ni," a ti a; a ṭul chuan sorkarin khirh zawka inkhuahkhirhna a siam a la ngai dawn tih a sawi.
Health secretary R Lalramnghaka tarlan danin, Mizoramah oxygen siam chhuahna khawl nei mi pali bakah, Aizawl Cilvil Hospital, ZMC leh district hospital ṭhenkhatah oxygen siam chhuahna a awm a; chu'ng aṭanga ni khata oxygen siam theih zat chu cubic metre 4,800 niin, Mizoram mamawh an phuhru theia ngaih a ni. Oxygen siamna kháwl neih belh tura hmalak mek a ni a, ventilator ngaihtuah belh mek a ni a; Covid-19 vei na zualte enkawlna Remdesvir pawh vial 1,000 chah mek a ni bawk.