COVID-19: Mizoram dinhmun Hripui vei 140 hmuh belh a ni
April 29, Ningani khan Mizoramah Covid-19 vei mi 140 hmuh chhuah a ni a, tun April thlaah hripui vei mi 1,545 hmuh chhuah a ni tawh. Nimin chhun khan hripui laka fihlim tawh mi pasarih chhuahtir an ni.
Covid-19 vei hmuh thar 140-te chu mipa 76 leh hmeichhia 64 an ni a; ZMC-a hmuh chhuah mi 52, TrueNAT-PCR hmanga hmuh mi pahnih leh RAT hmanga hmuh chhuah mi 86 an ni. ZMC leh TrueNAT-PCR hmanga hmuh chhuah zingah symptom nei an awm lo.
April 29 hi Mizorama ni khata hripui vei hmuh tam lamah pathumna a ni a, hmuh chhuah tam ber ni April 27, 2021-ah mi 228 hmuh niin, a dawttu September 9, 2020-ah mi 141 hmuh chhuah a ni.
Mizoramah Covid-19 vei mi 6,020 hmuh chhuah a ni tawh a, mipa 4,153 leh hmeichhia 1,867 an ni. Nimin tlai dar 5 thleng khan mi 4,926 (81.83%) chhuahtir an ni tawh a, mi 15 (0.25%) thi tawhin, enkawl mek mi 1,079 (17.92%) an awm.
April 29, Ningania Mizorama swab sample endik dan chu - ZMC laboratory-ah 637, TrueNAT-PCR hmangin district pakuaah 131 leh RAT hmangin district 11-ah 2,169 a ni a; sample endik zawng zawng chu 2,937 (mipa 1,666 leh hmeichhia
1,271) niin, chu'ng aṭanga hripui vei hmuh 140 chu 4.76% a ni.
Covid-19 vei hmuh chhuah thar mi 140 zinga mi 71 chu Mizorama kái chhâwng nia hriat an ni a, mi 69 chu state páwn aṭanga tun hnaia lut leh lut
hlim an ni. Tualchhunga kái zingah hri kàina hriat loh mi 22 an awm a; Covid-19natna (symptom) lang chhuak mi 41 an awm.
Hripui vanga nimina thi pakhat zawk Lalthlamuanzuala, Armed Veng South chu positive a ni tih hmuh chhuah a nih tirhah Covid-19 positive zatah ziah luh a ni lo a, nimin khan ziah luh chauh a ni.
Nimin khan hripui laka fi hlim tawh mi pasarih chhuahtir an ni a; SRH-ZMC, Siaha CCC leh Kolasib SIRD CCC aṭangin mi pakhat ṭheuh leh Lawngtlai CCC leh Mamit CCC aṭangin mi pahnih ve ve an chhuak a ni. Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah
positive 3,056 hmuh chhuah a ni tawh a, TrueNAT-PCR hmangin 728 leh RAT hmangin 2,235 hmuh chhuah a ni tawh.
April 29, 2021 thlengin Mizoramah swab sample 3,03,922 endik a ni tawh a, chu'ng aṭanga Covid-19 positive hmuh tawh zat 6,019 chu 1.98% a ni. Hripui vei hmuh tawh zinga mi 3,006 chu Mizoram chhunga kái chhâwng an ni a, mi 3,014 chu Mizoram páwn aṭanga an rawn luh hnua hmuh chhuah an ni thung.
COVID-19 VEI HMUH THARTE
ZMC-A HMUH CHHUAH - 37
TRUENAT-PCR-A HMUH - 2
RAT HMANGA HMUH CHHUAH - 86
