A tahtawlin leibá pek kan tum - P&E Minister

Power & Electricity minister R Lalzirliana chuan, Mizoram sorkarin kawlphetha man a bat chu a tahtawla pek tum a nih thu a sawi. Mizoramin kawlphetha man a bat nasat avangin company-te chuan power pek tawh lohah Mizoram sorkar an vau a ni.

Vanglaini palai zawhna chhangin R Lalzirliana chuan, kawlphetha man bá chu a tam tham avangin vawi khata pek tlak ngaihna a awm loh thu a sawi a, "Pek chu kan tum reng. Hetiang hi invaukhànna chi khat a ni. Chutih rual chuan, state ṭhenkhatah pawh an lo tih tawh anga power an pek sa an cut (tihtawp) chuan hmuh lêt leh a harsa khawp mai," a ti.

NHPC Ltd. chuan April 19, 2021 khan P&E Engineer-in-Chief hnen ah lehkha thawnin, Ministry of Power, Govt. of India dan tharin a phût angin Mizoram sorkarin kawlphetha a hman man a bat cheng vbc. 1.42 chu ni 45 a liam tawh avangin, April thla chhunga a rulh loh chuan kawlphetha an rawn pek chhunzawm theih tawh dawn loh thu an hriattir a ni.

NEEPCO Ltd. pawhin April 20, 2021 khan P&E E-in-C hnenah lehkha thawnin, Mizoram sorkarin kawlphetha man cheng vbc. 42.49 a bat thu a tarlang a, "Cheng vbc. 9.71 chu ni 45 chuang bat a ni tawh a, vbc. 11.28 pawh April 25, 2021-a ni 45 tling leh tur a nih avangin Ministry of Power dan thar zawmin, hemi hun chhunga kawlphetha chhit man ba ni 45 tling tawhte hi sorkarin a rulh loh chuan hmalak a ni ang," an ti.