Mizoramah Covid-19 vei mi 2 thi

Nimin khan Mizoramah Covid-19 vei mek mi pahnih chu State Referral Hospital (ZMC)-ah an thi a, hripui vei ni khata mi pahnih an thih vawi khatna a ni.

Mizoramah Covid-19 vei thi mi 15 an awm tawh. Covid-19 vei vanga SRH-ZMC-a enkawl mek J Sapzinga (82), Champhai Vengthlang chu nimin zing dar 5:45 khan a thi a, nimin tlai khan an khua thlenpui niin, an inah vui nghal a ni. Amah hi natna dang vangin SRH-ZMC-a awm sa a ni a, April 28, Nilaini khan Covid-19 positive a ni tih hmuh chhuah a ni.

Hripui vei SRH-ZMC-a enkawl mek Lalthlamuanzuala (47), Armed Veng South pawh nimin zing dar 9:20 khan a thi a, nimin vek khan an kawtah vui a ni. Amah hi Covid-19 positive a ni tih April 23, 2021 khan hmuh chhuah a ni a, Durtlang BSUP CCC-ah dah phawt ni mah se, a tûk, April 24-ah SRH-ZMC-ah sawn luh a ni.