KHAWTHLIR

Tawngtai rual
Mizoram Kohhran Hruaitute Committee (MKHC) chuan,  Covid-19 hripui léng mek a tàwp theih nan leh khuarel chhiatna vanga harsatna tâwkte puala ram pum huapa ṭawngṭai rual, May 8, Inrinni zan dar 7-ah a huaihawt dawn. MKHC-in ṭawngṭai rual a huaihawt turah hian kohhran hrang hrangte chuan an kohhran mite ṭheuh hnenah ngenna an chhuah leh dawn a ni.

Thisen pe
Hall Kawt FC, Bilkhawthlir chuan April 29, Ningani khan Kolasib District Hospital blood bank-ah thisen pek an huaihawt a, mipa pariatte'n thisen an pe a ni.

YMA-in khin lêt duh
Gauhati High Court, Aizawl Bench-in January 27, 2021-a Mizorama lui 16 kam humhalh ṭhiahna thupek a chhuah chu CYMA hruaitute nimina
ṭhukhawm chuan khin lêt (appeal) a nih theih nan sorkara thlen an rél. CYMA chuan, Tuirial Airfield-a Shivalaya Construction Pvt. Ltd-in
Tuirial lui dunga lung leh balu an lâk ṭhin chu titawp tura hriattir an rél bawk.

Helicopter tawp rih
GAD Aviation Wing chuan nimin khan thuchhuah siamin, nasa taka Covid-19 a hluar leh tâk avangin Mizorama helicopter service chu May 3, 2021 aṭangin thu leh awm hma chu tihtawp rih a ni dawn tih an tarlang. Ticket la lâwk tawhte tan chuan pek lêt (refund) theih a ni.

SRH-ah mi 76 awm
State Referral Hospitalah nimin khan Covid-19 vei mi pariat dah luh an ni a, anni nen SRH-ah hripui vei mi 76 enkawl mek an ni. SRH-ZMC
Bulletin tarlan danin, SRH-a Covid-19 vei enkawl mek zinga paruk chu ventilator hmantir mek an ni a, chu'ngte chu ICU-a awm mi pali leh Surgical Intensive Care Unit (SICU)-a awm mi pahnih an ni.

Vote chhiar dawn
Naktuk zing dar 8 aṭang hian April 17, 2021-a Serchhip biala MLA by-election-a vote tlate chhiar a ni dawn. Vote hi Serchhip DC Complex-ah chhiar a ni dawn a, table pasarih siam niin, round ngaah chhiar zawh tura ruahman a ni. Covid-19 léng mek avangin vote chhiarna hmunah
inkhuahkhirhna khauh taka kalpui a ni dawn tih sorkar thuchhuahin a tarlang.