Agriculture Minister-in kut hnathawktute theihtawp chhuah lehzual turin a ngen

Agriculture minister C Lalrinsanga chuan, ruahtui a tlâk har avang leh Covid-19 avanga hma hun hriat a nih loh avangin kut hnathawktute chu theihtawp chhuah lehzual turin a ngen. Vanglaini palaiin a kawmnaah Agriculture Minister chuan, Covid-19 avangin ei leh bâr lamah hma hun sawi lâwk theih a nih loh thu a sawi a, "Pathianin chakna min pek anga theihtawp chhuah lehzual turin kut hnathawktute ka ngen a ni. Kan ram chhung ngeia thar chhuah, thianghlim leh tharlám zawk ei thei tura kan inbuatsaih a ṭul. Rim taka kan thawh chuan Pathianin mal min sawm ngei ang," a ti.

C Lalrinsanga chuan, Covid-19 avangin inkhuahkhirhna kalpui mekah kut hnathawktute an lo leh huana kal phal lo khawpa hmalakna a awm a hlauh thu sawiin, "Ram hi khaw chhung aiin a him zawk. Kut hnathawh thlauhthla khawpa khauh a hlauhawm. Tam zawk thar chhuak tura ram lama hun hman tam a pawimawh," a ti a; mipui an taimak avangin nikumah Covid-19 in thlai thar chhuah a nghawng loh thu a sawi.

Ruahtui tlâk har vanga harsatna thleng kut hnathawktute aṭangin department-in an dawn loh thu sawiin Minister chuan, "Kan thar chhuah a nghawng lutuk chu ka ring lo. Chutihrualin, ruahtui tlâk har avangin thlai a thar har phah dawn. Leilet bikah chuan buh phun hun a la ni chiah lo a, ruahtui tlâk tam hun July thla vel aṭangin buh an phun ṭan tlangpui a ni," a ti. C Lalrinsanga chuan, vaimim chi an sem mek thu sawiin, "Kumin hian fall armyworm a rawn lang leh a, a dona atan kuminah chuan pesticide leh insecticide aiin tualchhunga siam theih uar kan tum. Sahbawn sen tui tak lutuk loa siam vaimim zîk mûm chunga thlawr a ṭha em em a, mihring tan pawh a him zawk," a ti a; mithiamte chhût dan chuan, kumin hi fall armyworm lan tawpna tur a nih thu a sawi bawk.