May 1 aṭangin kum 18-44 inkar Vaccine pek hman a ni dawn lo

Health & Family Welfare minister Dr R Lalthangliana chuan, sorkar laipuiin May 1 aṭanga kum 18-44 inkarte Covid-19 laka invênna damdawi (vaccine) pek turin ti mah se, vaccine indaih lohna avangin Mizoramah chuan May 1-ah pek ṭan theih a nih dawn loh thu a sawi.

Nimina Taxation conference hall-a ṭhutkhawmnaah Health Minister chuan, Mizoramah kum 18-44 inkar, Covid vaccine pek ngai tur mi nuai 4,40,000 vel an awm thu a sawi a, "Vaccine mamawhna a san avangin kum 18-44 inkar pek tur hi India ram hmun dangah pawh May 1 aṭang chuan an ṭan theih a rinawm loh. Chutih rualin, Ministry of HFW chuan kum 18-44 tan hian vaccine siamtute nen Mizoram tan dose 16,340 dah turin an inbiakrem tawh thu Mizoram sorkar an rawn hrilh a ni," a ti.

Dr R Lalthangliana chuan, Chief Minister remtihnain Serum Institute of India hnenah vaccine dose 10,22,000 an dil thu sawiin, "Kar li chhungin min pek theih dawn leh dawn loh an rawn sawi dawn," a ti a; vaccine tam zawk hmuh a nih theihna atan theihtawp an chhuah thu a sawi. National Health Mission director Dr Eric Zomawia sawi danin, Serum Institute of India chuan Covid-19 vaccine man chu dose khatah Rs. 400 aṭangin Rs. 300-ah a tihniam a, Rs. 300 bakah, GST 5% a la awm. A hmaa kum 18-44 hnena vaccine pekna atan hian cheng vbc. 40 chuang sen ngai tura chhût chu cheng vbc. 30.66 velah a tlahniam thei dawna ngaih a ni.

Kum 18-44 inkarte'n Covid vaccine man an chawi leh chawi loh tur chu sorkar hotute thutlukna tur a ni a; mimal damdawi-inte'n vaccine an chah chhuak zel a nih chuan sorkar senso a tlem zual tura ngaih a ni. Nimin chawhma dar 10 thleng khan Mizoram pumah Covid-19 vaccine 2,46,478 pek a ni tawh a, mi 45,435 chuan dose hnih dawng tawhin, a bak zawng chuan dose khat an dawng.