Random test kalpui a ni dawn

State Disaster Management Authority (SDMA) hnuaia State Executive Committee chairman Lalnunmawia Chuaungo, chief secretary chuan, Covid-19 random test nei turin nimin khan Health & Family Welfare department a hriattir.

Chief Secretary thuchhuah chuan, "Covid-19 hri vei zingah an kàina chin hriat loh leh chhui theih loh eng emaw zat an awm tâk avangin mipui mimir zingah hri a darh nasa hle tawh nia ngaih theih a ni. Eng ang chiaha darh zau nge tih hriatna tur leh hmalak zel dan tur ruahmanna siam kawnga thuneitute ṭanpui turin random Covid-19 testing neih a lo ṭul ta a ni," a ti a; random test chu swab sample endiksak turte remtihnaa kalpui tur a nih thu a tarlang bawk.