Lunglei mipui bumah Health Minister puh Lungleia RT-PCR bun tumna a tàwpah ngai

Lungleia RT-PCR khawl hman a la nih loh chungchangah Lunglei District Youth Congress Committee (LDYCC) chuan Health minister Dr R Lalthangliana chu Lunglei mipui bumah an puh. ZPM Southern Headquarters pawhin Lungleia RT-PCR laboratory bun tumna chu a zuih ral taa an ngaih thu an tarlang.

LDYCC chuan, April 29, Ningania Lunglei DC conference hall-a Covid-19 chungchang sawihonaa Health Minister thusawi aṭang leh a hmaa Lunglei tana RT-PCR an chah thu a sawi tawhte aṭangin, Health Minister-in Lunglei mipui min bum a ni tih chiang taka a lan thu an tarlang a ni.

LDYCC tarlan danin, nikum July thlaa chanchinbu chhuakah Health Minister-in Lungleia hman tur pawh RT-PCR khawl chah a ni tih a sawi thu tarlan a ni a; chumi avang chuan MLA Zodintluanga Ralte-in Lunglei District Hospital-a hman tur RT-PCR chah a tum pawh chah a ngaih loh thu minister Lalruatkima'n Facebook-ah June 27, 2020 khan a sawi a ni.

Lunglei District Hospital tan sorkarin tun thlengin RT-PCR a ruahman reng reng lo tih a lang chiang tawh tih sawiin LDYCC chuan, "Pawi kan ti tak zet a ni," an ti a; Zodintluanga Ralte-in Lunglei district tana RT-PCR khawl a pek chungchanga Health Minister-in April 29-a a sawi dan chu mak an tih thu an tarlang.

ZPM Southern Headquarters, Lunglei pawhin thuchhuah siamin, Civil Hospital, Lungleia RT-PCR laboratory bun tumna chu a zuih ral taa an ngaih thu an tarlang a, "Hei hi sorkarin chhim bial min ngaihthahna niin kan hria a pawi kan ti hle a ni," an ti. Lunglei ZPM chuan, an vice president Lalrinpuii'n Lunglei Civil Hospital-ah RT-PCR khawl hman a nih ve theih nan tun hnaiah Prime Minister hnenah ngenna a thlen thu an tarlang a, "Sorkar thuneitute lamin hmalakna eng mah an nei lo mai pawh ni loa Truenat Quattro chungchang chauh meeting pawimawha an la sawi hi chhim bial ngaihthahna a ni," an ti a; Lungleiah RT-PCR bun a nih theih nan theihtawp an chhuah zel dawn thu an sawi bawk.