Serchhip bial by-election-ah Lalduhoma thlan tlin a ni

April 17, 2021-a Serchhip Assembly constituency by-election-a vote tlate chu nimin khan Serchhip DC pisaah chhiar a ni a, Zoram Peoples Movement (ZPM) candidate Lalduhoma thlan tlin a ni.

Vote tla zawng zawng 16,555 aṭangin thlan tlin tâk Lalduhoma'n vote 8,269 (49.95%) a hmu a, amah hnaih bertu MNF candidate Vanlalzawma'n vote 5,319 (32.13%) a hmu a; an inthlauhna chu vote 2,950 a ni a, hei hi Serchhip biala MLA inthlanah inhnehna sang ber a nia hriat a ni

Nimin zing dar 8 khan Serchhip district election commissioner (DEO) Kumar Abhishek, bawrhsap kaihhruaina hnuaiah vote chhiar ṭan a ni a; postal ballot leh elec­tronic voting machine (EVM)-a vote tlate chhiar zawh a nih hnuah, vote chhiar a dik ngei tih finfiahna atan Election Commission of India (ECI) duh dan angin VVPAT-a vote tlate chhiar leh a ni.

Covid-19 hripui léng mek avanga ECI-in inkaihhruaina a siam angin, political party hrang hranga counting agent-te chu a inkár thlakin PPE hâktir an ni a, vote chhiarna chheh velah mipui pungkhawm an awm lo.

Vote chu round ngaa chhiar niin Serchhip bialah hian polling station 29 a awm a, chung zinga 26-ah chuan Lalduhoma a chak a; Buangpui leh Neihloh PS-ah Vanlalzawma a chak a, Serchhip-V PS (Hmar Veng)-ah INC candidate PC Laltlansanga a chak thung. Lalduhoma hi Buangpui leh Neihlohah pahnihna a ni a, Serchhip V-ah pathumna a ni.

Postal ballot hmangin mi 188-in vote an thlak a, Lalduhoma'n vote 74, Vanlalzawma'n 58, PC Laltlansanga'n 43, BJP candidate Lalhriatrenga Chhangte-in vote 9 leh MPC candidate Vanlalruata'n vote 2 a hmu a, NOTA-ah vote 2 a tla.

Kum 2018-a Assembly General Election-ah Lalduhoma hi Serchhip bialah thlan tlin a lo ni tawh a, amah hnaih bertu INC candidate Lal Thanhawla chu vote 410-in a hneh. Tun ṭum by-election-a a chakna hi kum 2018 aiin vote 2,540-in a tam zawk.

Kum 2018 inthlana candidate zingah Lalduhoma leh MPC candidate Vanlalruata-te by-election-ah hian an ding nawn a, Vanlalruata hi kum 2018-ah chuan PRISM candidate a ni.

Tarlan tawh ṭhin angin, MNF MLA 12-te chuan Lalduhoma hi Constitution 10th Schedule Para 2(2) bawhchhiaah puhin, Assembly Speaker hnenah September 22 leh 24 khan an hêk a, chu vang chuan Speaker Lalrinliana Sailo-in November 27, 2020 khan MLA aṭangin a bàn. Hei vang hian ECI chuan Serchhip bialah by-election a buatsaih ta a ni.