'Serchhip mipuiin ro an rêl ta; Mipuite hnehna a ni' - Duhoma

Serchhip bial Assembly by-election-a thlan tlin Zoram Peoples Movement candidate Lalduhoma chuan, thlan tlin a ni chu mipui hnehna a nih thu a sawi a; MNF MLA-te'n an hêknaah, 'Serchhip mipuiin ro an rel ta' nia a ngaih thu sawiin, Serchhip bial mipui tan a ding tlat dawn tih a sawi.

Thlan tlin a nih hnua thuthar thehdarhtute'n an kawmnaah Lalduhoma chuan, "Mipuite hnehna a ni. Kan party chakna a ni lo. Serchhip bial mipui, neutral-te min khawngaihna a ni a, kan party chakna a ni lo," a ti. Vote 2,955-a chak a inbeisei loh thu sawiin, "Thil mak a thleng a ni. By-election chu ruling chanah kan dah ṭhin a, heti taka sanga ka chak hi thil mak a ni," a ti.

Lalduhoma chuan, MLA aṭanga bàn a nih chungchanga zawhna chhángin, "Min disqualify khan Pathian hian thil tum a neiin ka hria a, Pathian hian ruat lâwk a nei niin ka hria... Mimal takin Pathian hian min chawi san a duh a, kan party hi chawi san a duh a ni," a ti a, Pathian ruat lâwk a thleng ta nia a hriat thu a sawi.

MNF MLA-te amah an hêkna chu a letling tih sawiin Duhoma chuan, "ZPM bànsana mahni thlangtute phatsantuah min puh tur a ni a, 'A ZPM lutuk' min ti daih a. Court-ah pawh kal ila thiam kan chang sa dawn a, law court-a kal loin mipui court-ah kan kal a, Serchhip mipuiin ro an rél ta a ni," a ti.

ZPM Leader chuan, mipui aiawha thlan tlin a nih thu sawiin, "Bial pumpui aiawh MLA ka ni dawn. ZPM MLA mai ka ni dawn lo a, min vote lotute MLA ka ni dawn. He bial aiawh hian, mi zawng zawng aiawhin ka ding dawn. Mi tin hma kan tâwn dawn a, chu chu an phu ngawih ngawih a ni... Sorkar huna hmalak tuma kan hmachhawp hi tihhlawhtlin kan tum dawn a ni," a ti a; ZPM-in ramlai malsawmna an hâi chhuah tur thu a sawi.

Zawhna chhangin Lalduhoma chuan, by-election chuan kum 2023-a MLA inthlanah nghawng a neih tur thu a sawi a, "Final lut tur chuan semi final-a chak phawt a ngai. Kum 2018-ah pahnihna kan ni a, opposition party lian ber kan ni. AMC-ah pahnihna kan ni leh a, tunah kan chak leh bawk. Semi final-ah vawi thum kan chak ta a, kum 2023-ah ZPM leh MNF kan inbei dâwn a ni," a ti a; by-election result chuan mipuiin MNF chu inthlan leh hunah sorkartir tawh loh an duh tih a langa a hriat thu a tarlang.

Lalduhoma chuan, inthlan campaign laia MNF party-in Serchhip bial mipuite tana an tiamte chu bawhzui a tum thu sawiin, "Muster roll-a thun, transfer, housing loan pek, police-a lut tura tiam leh sorkar hna pek tura an intiamte chu Serchhip bialtu ka nih angin nawr zui ka tum dawn. Sorkar pawhin min tihhlawhtlinsak turah ka ngai," a ti.

Serchhip bial mipuite fakin Lalduhoma chuan, "Therhlo leh thlêmna tam tak karah mipui náwlpui hian an chhia leh ṭha hriatnaa dik nia an hriat an kal tlangpui ngam a, dikna dinpui ngamin mipui náwlpuiin thutlukna an siam ngam a ni," a ti.