KHAWTHLIR

Kuang leh puan pe
YMA, Mission veng Branch chuan nimin khan Zoram Medical College (ZMC)-ah Covid-19 vanga thi an awm palha hman turin kuang pakhat leh puan 20 an pe. Ṭanpuina hi YMA president Vanlal­dinga'n ZMC hotute hnenah a hlàn a ni.

Thisen pe
May 1, Inrinni khan ṬKP, Bawngkawn Bial chuan BCM, Chaltlang kohhran hall-ah Civil Hospital, Aizawl tan thisen unit 45 an pe a, petute mipa 35 leh hmeichhia 10 an ni. ECM KTP, Tipa Bial pawhin Siaha District Hospital tan thisen unit 51 an pe a, petute mipa 40 leh hmeichhia 11 an ni.

Surat-ah thi hâl
Covid-19 vanga April 30, Zirtawpni chawhnu dar 3:30-a Surat, Gujarat-a thi Lalruatkimi (25) d/o Lalnunthara (L), Ramhlun Vengthar chu April 30 zan khan Surat-ah hâl ral a ni. Gujarat Mizo Zirlai Pawl secretary H Lalruatpuia sawi danin, Lalruatkimi vâp chu a ṭhiante'n vawiin hian an rawn hawpui ang.

Lungin déng hlum
Sawmi (35), Mamit Hmarveng chu May 1, 2021 chhun dar 1:30 vel khan lung lumin a déng a, ka chhawn lohin a hmunah a thi. Thu dawn danin, Sawmi hi quarry-ah hna thawkin a awm a, lung chhut tur a lâk laiin a chhaka P&E department-in Mamit-Bairabi inkara electric lak luhna tur 132kv line ban an phunna JCB (backhoe loader) hna thawk mekte lung tihlumin a déng a ni.

ICU-ah mi 11 awm
State Referral Hospital-ah Covid-19 vei mi 92 enkawl mek an ni a, an zinga mi pariat chu nimina dah luh an ni. SRH-ZMC Bulletin tarlan danin, hripui vei SRH-a enkawl mek zinga 11 chu ICU-ah an awm a, mi paruk chu ventilator hmantir mek an ni. Ward hrang hrangah hripui vei mi 81 an awm a, an zinga pakhat chu oxygen pek mek a ni.

Vawk 2,163 thi tawh
AH&Vety chhinchhiah danin, nimin khan African Swine Fever (ASF) lènna hmuna puan tawh khua/veng 13-ah vawk 34 a thi leh a, heti hian Mizoramah ASF vangin vawk 1,621 a thi tawh. ASF lènnaa la puan loh hmun 43-a vawk 542 thi tawhte nen vawk 2,163 a thi tawh a ni.

Thliin a tihchhiatte MLA-in tlawh
Aizawl South-ll bialtu MLA Lalchhuanthanga chuan, April 30, 2021-a thli tlehin a bial chhung ITI Venga in a tihchhiate chu May 1, Inrinni zing khan a tlawh a, bialtu coun­cil­lor Malsawmzuala Ralte leh councillor dang Baryl Van­neihsangi ten an ṭawiawm. Thli tleh hian ITI Venga R Sangzika leh PC Sangliani inte bakah, chhungkaw pahnih luah lai Health department quarters a tichhia a; Lalchhuanthanga chuan, in leh lo chhiate chu a theih ang anga ṭanpui an nih theih nan Aizawl DC leh DDMA-ah hma lâkpui a tum thu a sawi. In chhiate chu Inrinni khan ITI Veng LC leh YMA-in thawm ṭhat hnatlang an nei a, hnatlangte ei leh in senso atan Rs. 3,000 a pe a ni.

Tut lui bulah thiin chhar
Lalhrangkima (46) s/o H Lalramliana, Mamit Dinthar Veng, chin hriat loha bo chu ni hnih zawn a nih hnuah May 1, Inrinni khan thia hmuh a ni. Mamit aṭanga thu dawn danin, Lalhrangkima hi April 26, 2021 aṭangin Tlangkhang rama thlámah a thiante nen an riak a; April 30, Zirtawpni zing dar 3 velah thlám aṭangin a chhuak a ni. Zirtawpni zing aṭangin a chhungte leh ṭhiante'n an zawng a, Inrinni chhun dar 1:30 vel khan Tut lui kama Tlangkhangah thiin an hmu ta a ni.