Covid-19 vei SRH-ZMC-ah thi

Covid-19 vei State Referral Hospital (ZMC)-a enkawl mek J Rawna (64), Damveng, Aizawl chu nimin tlai dar 5:30 vel khan a thi a; Mizorama Covid-19 vanga thi 16-na a ni.

Damveng aṭanga thu dawn danin, J Rawna hi MADC-a MDC hlui a ni a, Covid-19 a vei tih April 30, 2021 khan hmuh chhuah a ni a, a tûk May 1, Inrinni khan SRH-ZMC-ah dah luh nghal a ni. J Rawna nupui fanaute pawh Covid-19 positive an ni a, Covid care centre-ah an awm mek a ni.

Mizoramah Covid-19 vei enkawl laia thi mi 16 an awm tawh a, thi hmasa ber R Lalsangkhuma chu October 28, 2020 khan SRH-ZMC-ah a thi. Nikum chhung khan mi pariat an thi a, kumin 2021-ah mi pariat vek an thi tawh.

Kumin April thla bikah mi pali an thi tawh bawk.