Mizoramah lockdown kalpui

Mizoram sorkar chuan April 26 - May 3, 2021 zing dar 4 thleng inkhuahkhirhna kalpui tura a tih tawh chu May 11, 2021 zing dar 4 thleng turin a pawtsei. Aizawl khawpui chhung leh district khawpuiahte zan dar 7 aṭanga zing dar 4 inkar curfew a ni dawn.

Inkhuahkhirhna pawhsei chungchangah hian Disaster Manage­ment & Rehabilitation (DMR) department chuan May 1, Inrinni khan thupek (order) a tichhuak a, inkaihhruaina Standard Operating Procedure (SOP) pawh a tichhuak nghal.

Inkaihhruaina tharah hian tihdanglam eng emaw zat a awm a; LTF/VTF-te hriatpuina leh SOP zâwm chungin Thawhṭanni, Nilaini leh Zirtawpniahte dawr ṭhenkhat hawn theih a ni dawn.

May 11, 2021 zing dar 4 thlenga hman tur Mizoram sorkarin inkaihhruaina thar a tihchhuahah, hmasawnna hnathawh chungchang tarlanna (5.2)-ah chuan, lo neitu leh huan neitu te, ran vulhtu te, sangha dil neitute leh thawktute chu phalna hranpa lak ngai loin an hna thawh phalsak a ni a; rama riah pawh phal a ni.

Hetih lai hian, lo/huana kal/feh turte'n police/Covid-19 executive duty-te endik dâwl turin LTF/VTF-te phalna lehkha emaw, an kalna tur lo/huan an nei ngei a ni tih lantirna document (LSC, periodic patta,adt.) emaw an ken a ngaih thu a tarlang tel a ni thung.

Inkaihhruaina ṭhenkhat
I. Screening leh quarantine
• Mizorama lut turte chu sorkarin entry point a hawn mek kaltlang chauhin an lut thei ang.
• Mizoram an lo luhna (point of entry)-ah RAT hmanga en dik vek an ni ang.
• RAT negative-te chu fimkhur takin mahni hriselna inchîkin ni 10 chhung mahni inah inkhung tur. Ni 10 hnuah RT-PCR/TrueNat test a ni ang a, negative an nih chuan inkhung zui a ngai tawh lo.
• Home quarantine turte'n inkhung hranna tur, riahna leh inthiarna hran an nei tur a ni.
• Riahna leh inthiarna hranpa nei lo, home quarantine phalsakte chu an chhungkaw member dangte pawh ni 10 chhung inkhung ve nghal tur.
• Home quarantine-a awmna tur hmunhma nei lo tan hotel (paid quarantine) emaw, quarantine centre-ah emaw awm theih a ni.

II. Bungraw lâk luh leh thiar
• State pawn aṭanga bungraw lak luh nan phalna hranpa lak ngai lo. mCOVID-19-ah an in-register vek tur.
• Bungraw phur motor-ah driver leh handyman chiah chuan tur a ni.
• State pawn truck-te'n backload tur zawngin Mizoram hmun dangah an kal tur a ni lo.

III. Dawr leh sumdawnna
• Bazarpuia thlai leh thil dang zawrh khap a ni.
• Ṭul bik thil vanga chhuah ngai - damdawi lei tur, ni tin mamawh lei tur leh doctor hnena inentir turte chuan an awmna VTF/LTF-te phalna an la hmasa tur a ni.
• AMC leh district khawpuiah LTF/VTF hriatpuinain Thawhṭanni, Nilaini leh Zirtawpniah tlai dar 5 thlengin ni tin mamawh leh eichawp, thlai leh thei, sa leh sangha, thlai chi, leiṭha, ran chaw leh hmanrua, essential courier service, e-commerce, home delivery service, bungraw phur motor mamawh, oil leh spare part zawrhna dawr, motor siamna bik workshop/ puncture works, cold storage leh warehousing service, steel, cement, brick, balu leh insakna bungrua ilo zawrhna dawrte hawn phal a ni.
• Mipuiin awlsam taka thlai leh chawhmeh an hmuh theih nan LTF/VTF-te'n chawhmeh lei theihna tur an ruahman ang.
• Chhungkua/mimal eizawnna kaihhnawih ni lo, a huhoa lui kal, ramhnuaia picnic/ intihhlim, hiking leh adventure sport-te khap a ni.

IV. Sorkar office
• Office kal turte'n anmahni ruatna detailment order - en theihin an keng tur a ni.
• Sorkar hnathawk leh sorkar sum aṭanga hlawh late chu Covid-19 duty turin a ṭulna apiangah hman an ni ang a, duty tura ruat lohte'n LTF/VTF-te a ṭul apiangah an ṭawiawm ang.

V. AMC leh district-a hnathawh
• Retaining wall/ drain/ kawng siam, building sak, kawng laih, leidawh te leh chutiang kawnga hmalaknate chu ramchhunga awm sa labour-te chauh ruaia thawh chhunzawm phal a ni.
• Lo neitu leh huan neitu te, ran vulhtute, sangha dil neitute leh thawktute tan phalna lak a ngai lo; hmun khata mi panga aia tam awm khap a ni.
• Lo/huana kal/feh turte'n document ṭul ang an keng tur a ni.
• Electrician, plumber, mechanic, thing leh cement mistiri leh helper-te chu an hna thawhna LTF/VTF hriatpuinain hna thawh phalsak an ni.
• Quarry-a lung lak, block/ brick siam, rawra her leh chhut leh thingzai khawl (saw-mill) a thing zai theih a ni.

VI. Zirna, sakhaw hmun, etc.
• Public park, picnic spot, movie theatre, gym, football/ futsal ground, community hall, restaurant, shopping complex, mall, phalna pek ni lo dawrte leh intàwllênna hmunte khâr tur.
• Zirna-in leh sakhaw biakna hmunte khâr tur a ni.
• Board exam, all India level exam, recruitment exam adt. chu phalna hranpa pekte chauh kalpui theih a ni.
• Mitthi vuina, inneihna leh reception-ah mi 30 aia tam punkhawm phal a ni lo.
• Chhiatni/ṭhatni leh puipunnaah ei leh in sem/siam phal a ni lo.
• Birthday, anniversary lawmna, games & sports, book release, lungphun leh intihhlimnate huaihawt phal a ni lo.

VII. Inkhuahkhirhnain a huam lohte
1. Hospital, nursing home, clinic, laboratory, OST centre, ART centre, blood bank leh damdawi dawr.
2. Veterinary hospital, dispensary, clinic, zoo leh hatchery.
3. Bank, non-banking financial institutions, insurance, ATM leh post office.
4. Petrol/diesel filling station leh LPG storehouse.
5. Fair price shop/ ration dawr.
6. Covid-19 duty-te hman taxi leh rental motor.
7. Covid-19 vaccination leh immunization programme leh ambulance service.
8. Animal disease control programme.
9. Postal service, blood donation camp/service.
10. Kohhran hna ṭul zual thawk tura Kohhran office kal leh kohhran hotute programme pawimawh bik.
11. Nau pai, nausen pawmlai leh naupangte hnena nutrition (chaw ṭha) sem.
12. Bawnghnute sem leh lakkhawm.
13. Power & electricity, water supply (mimal tui chawi te huamin), sanitation & solid waste management (hmunphiat leh bawlhhlawh paihte huamin), telecommunication, internet service, broadcasting leh cable service.
14. MGNREGS, MPLADS leh MLALADS hnuaia hnathawh.
15. Print & electronic media leh chanchinbu sem.
16. Bungraw hlan leh hlanthlak hna.
17. Private security service.
18. Medical emergency leh chhiat tawh thila awmna veng LTF/VTF-te hriatpuina lehkha nei.