ZPM party-in lawmthu an sawi

ZPM party chuan thuchhuah siamin, Serchhip biala Assembly by-election-ah an party-in hnehna an chang leh an candidate Lalduhoma thlan tlin a ni chu lawmawm an tih thu an tarlang a, "Pathian leh bial mipui chungah leh thawktute zawng zawng chungah lawmthu kan sawi e," an ti.

Inthlan an hmachhawn dawn leh hmachhawn laia thâ leh zung sêngtu te, ṭawngṭaipuitu te, sum leh paia an party leh an candidate puitute chungah lawmthu sawiin ZPM chuan, "Serchhip biala vote nei lo, awmhmun aṭanga nasa taka min puitute chungah kan lawm tak zet a ni," an ti a; by-election-a an chakna chu ZPM chakna ringawt ni loin, mipui thawh rah a nih thu an sawi.

ZPM vice president K Sapdanga chuan, dik tak leh thianghlim taka inthlang tluan chhuak turin Pathian hnenah an dil ṭhin tih sawiin, "Pathianin min chhàn avangin a hnenah lawmthu kan sawi a, Serchhip bial mipui hnenah an rilru huaisenna avangin lawmthu kan sawi bawk. Kan hotupa Pu Lalduhoma thawhrimna a fakawm hle a, bial tan leh Mizoram mipui tan ṭangkai lehzuala thawk turin duhsakna kan hlan e," a ti.