MGNREGS-ah cheng nuai 7788.34 hmu

Rural Development (RD) minister Lalruatkima chuan, kum 2021-22 chhunga MGNREGS (ni 100 inhlawhna) hnuaia inhlawhna turin Ministry of Rural Development-in April 2021 khan Mizoram tan cheng nuai 7788.34 a pek (sanction) thu a sawi.

Lalruatkima chuan, Covid-19 hri léng karah thingtlang lama mite'n harsatna an tawhte chhâwk zângkhai a nih theih nan RD department-in theihtawpin hma an la tih a sawi a, "Kum 2021-22 chhunga MGNREGS hnuaia inhlawhna turin Ministry of RD chuan April 2021 khan cheng nuai 7788.34 lai a rawn sanction a ni," a ti a; kumin aṭangin job card holder pakhatin ni khatah Rs. 233 zel an hlawh tawh dawn thu a sawi.

Mizoramah job card nei mi 2,05,481 an awm mek thu sawiin Minister chuan, "Mizoram pumah chawhruala lakin April thlaah ni 11, May thlaah ni 12 leh June thlaah ni 10 inhlawh turin ruahmanna siam a ni," a ti.

Lalruatkima chuan, MGNREGS hnuaiah tuihna tipung tam thei tura kum 2019 aṭanga hmalakna, 'Jal Shakti Abhiyan - Catch the Rain Campaign' kalpui a nih leh khaw ṭhenkhata tuikhur hnára contour trench siam chuan tuihna a tih tam zual thu a sawi a, "Kum dang zawng aiin ṭhálah kang loin tui a luang reng tawh a, a bik takin Tuipang RD Block hnuaiah kan hlawhtling hle a ni," a ti a; Jal Shakti Abhiyan chu Mizoram khaw tinah kalpui tum a nih thu a sawi.