Thu dik chauh sawi turin CM chah

ZPM Ṭhalai chuan thuchhuah siamin, chief minister Zoramthanga chu Covid-19 do kawngah thu dik chauh sawi tawh turin an chah a; Delhi Vasant Vihar-a Mizoram House chu Covid-19 vei Mizote enkawl nan ICU anga siam vat turin an ngen.

CM Zoramthanga'n a Instagram account-ah April 28, 2021 khan Delhi Mizote tan Vasant Vihar-a Mizoram House chu damlote dahna turin ICU anga function thei turin Mizoram sorkarin hma a lâk nghal tur thu a tarlang tih sawiin ZPM Ṭhalai chuan, "Mizoram House enkawltute leh GAD-a thawkte'n an hriat loh thu an sawi thung a ni," an ti.

ZPM ṭhalaite chuan, "Chief Minister berin a tih dan phung pangngaia a mumang leh suangtuahna ram a rawn thlasik mau puah chhuah leh phawng mai hi àwm ang lo kan ti. Dinhmun ṭha lo taka kan awm lai hian CM hian a tihhlawhtlin theih nghal mai loh tur thu sawia phúl chiam rih lo tur leh mipui hnenah beiseina beidawnthlâk siamsak lo turin kan ngen a ni," an ti a; Vasant Vihar-a Mizoram House chu a sawi ang ngeia ICU anga kaltir vat turin an ngen a ni.