BJP leh PC-in ZPM an lawmpui

BJP, Mizoram Pradesh leh Peoples' Conference party-te chuan thuchhuah siamin, Serchhip bial by-election-a chak ZPM party leh an candidate Lalduhoma an lawmpui thu an tarlang.

Mizoram BJP chuan, "Serchhip bial by-election neih zawh takah inthlanna felfai tak neih niin, Pu Lalduhawma thlan tlin a ni chu kan lawmpui a, Mizoram leh hnam tan ṭhahnemngai taka thawk zel turin duhsakna kan hlan a ni," an ti.

BJP chuan, an candidate Lalhriatrenga Chhangte vote-tute chungah lawmthu an sawi nghal a; kum 2023 MLA inthlanpui awm tur atan theihtawp chhuahin hma an la chhunzawm zel dawn tih an sawi bawk.

PC party chuan, "Serchhip bial by-election result puanah felfai taka hnehna changtu ZPM party leh an candidate Pu Lalduhoma kan lawmpui a, kan ram leh Serchhip bial tan theihtawp chhuah turin duhsakna kan hlan e," an ti.

PC party chuan, "Kan candidate Pu Vanlalruata, a tling pha dawn lo tih hre reng chunga vote-tu zawng zawng chungah kan lawm tak zet," an ti a; politics thila inhuatna te, phuba lâk duhnate leh Mizo ram leh hnam tana ṭangkai lo apiang dahṭha a, lungrual taka thawhho tum turin MLA-te an chah bawk.