Reserved forest ṭhiahna thupek Khing lêt turin CYMA-in hma a la

Gauhati High Court (GHC), Aizawl Bench-in January 27, 2021-a Mizorama lui 16 kam, forest reserved ni ṭhin a ṭhiahna thupek chu sût leh a nih theih nan Central YMA chuan an khing lêt dawn a, hma an la mek.

Vanglaini palai zawhna chhangin CYMA president Van­lalruata chuan, forest reserved a chereu nasat avangin High Court order chu khin lêt tum an nih thu a sawia, "Kan forest reserved-in suasam a tâwk a, kan tuihna thlengin harsatna kan tawh phah. Chuvangin, keini chuan kan forest reserved hi humhim kan duh a, chumi a nih theihna atan chuan hmalak kan tum a ni," a ti.

Vanlalruata chuan, an hmalak dan tur tak a la hriat loh thu sawiin, "GHC Chief Justice hnenah kan thil tum leh duhte kan thlen ang a, chumi min chhanna ang chuan hma kan la ang. Lehkha thehluh tur kan buatsaih mek," a ti a; he thubuaiah hian a tirah CYMA an tel ve loh avangin appeal pangngai ang chuan a kal theih loh mai theih tih a sawi.

Mizoram sorkar hnenah chuan thu thlen an tum tawh loh thu sawiin CYMA President chuan, "Court order hi khin lêt an tum lo tih a chiang tawh a, chuvangin, anni hnena thil thlen leh chu awmzia a awm tawh loah kan ngai," a ti.

Tarlan tawh angin, April 30, 2021-a YMA Central Executive Committee ṭhukhawm chuan reserve forest chungchanga GHC, Aizawl Bench thutlukna chu khin lêt an rêl a ni.

Vanglaini thu dawn danin, Mizoram Chief Secretary-in August 5, 2016-a order a chhuah leh January 28, 1965-a notification a tihchhuah, The Mizo District (Forest) Act, 1955-a Section ṭhenkhat chu mi 681-in GHC, Aizawl Bench-ah an khing a ni. He dan chungchanga sorkar order leh notification chu High Court-in a tibo a; chuvang chuan mi 681 hnenah zangnadawmna cheng nuai 3,000 chuang Mizoram sorkarin a sèn belh a ngai dawn a ni.

Chief Secretary order leh January 28, 1965-a notification ang chuan, Tuirial HEP siamna atana ram lak neitu mi 681-te ram chu forest reserved chhunga awm a nih avangin zangnadawmna an dawng thei lo. Mahse, mi 681-te chu GHC-ah an zualko a, Court chuan tun hnai khan thu­tlukna siamin, mi 681-te chu an chak. Hei vang hian mi 681 hnenah Mizoram sorkarin zang­nadawmna a pek a ngai dawn.

Hetih lai hian, Assembly session hnuhnung berah khan INC member C Ngunlianchunga zawhna ziaka P&E minister R Lalzirliana'n a chhànnaah chuan, Tuirial Hydro Electric Power Project-a zangnadawmna chung­changah sorkarin court sang zawkah kal tumna a neih loh thu a tarlang a, "Court order angin petitioner-te hnenah hian zangna­dawmna pek dan tur ngaihtuah mek a ni," tih a ni.