Lockdown laia chhuah phalna nei RV leh Phunchawng pan an tam

Covid-19 darh mek avanga khawpuia lockdown puan a nih mek laiin, sorkar department leh mimal identity card nei tam takin Rangvamual leh Phunchawng lam an pan a, Police leh Hunthar Veng Local Task Force-te'n zu tam tham tak an mansak tawh.

Vanglaini palaiin April 30, 2021 (Zirtawpni)-a a tlawhnaah Company Pêng, Hunthar Venga Police leh LTF duty-te chuan, mi veivâk an tam chu an hahpui thu leh Rangvamual leh Phunchawng pantu zingah zu rûi saa kal, ṭawngkam na taka duty-te ṭawng khumtu pawh an tawn nual tawh thu an sawi.

Hunthar LTF chairman K Lalfakawma chuan, "Tun lockdown-ah hian mihring chhuakvâk an tam em em mai a, civil mi aiin sorkar department ID card awrh an tam zawk. Sorkar hnathawk ID card awrh zingah zu mansak pawh kan nei nual," a ti.

K Lalfakawma chuan, "Eng lai pawhin kal lam leh haw lam an awm reng a, hri dona lamah zu do tel a ngai bawk si a, a buaithlak hle," a ti. Hun eng emaw chen Company Pénga Vanglaini palai a awm ve lai pawhin lirthei kal a châwl lo tluk a ni.

Company Pénga duty-te chuan, "Mi ṭhenkhat, RV leh Phunchawng lam aṭanga lo haw zingah Company Pénga duty-na hmun thlen hmaa chhuk a, step-a hêl a, zu hâwn ṭhinte pawh an awm a, man pawh kan nei fo a, hmeichhia pawh an bâng chuang lo," an ti a; lirthei veivâk tam lutuk chu mak an tih thu an sawi.

Police duty-te sawi danin, Company Péngah hian sorkarin a ruat executive duty pahnih, police pathum leh Hunthar Veng LTF mite zing dar 9 aṭanga tlai dar 5 thleng an duty ṭhin. Company Péng paltlang tumte chu ID awrh thei an ni ber a, sorkar department hrang hranga duty nia insawite an ni. Chu'ng mite zingah chuan zu la an tam ber a ni.

Company Pénga duty-te chuan, zu eng emaw zat an man tawh thu leh zu an mante chu Vaivakawn Police Station-in tlaiah an lâk ṭhin thu an sawi a, "Zu fûn 2/1 kan mante chu kan kaltir mai a, permit dik loa kalte pawh kan chawitir mai ṭhin," an ti.