April 2021-ah Covid-19 vei Mi 1,656 hmuh chhuah a ni

April 2021 thla chhung khan Mizoramah Covid-19 vei mi 1,656 hmuh chhuah a ni a, hripui vei hmuh chhuah tam ber thla a ni.

Mizoram sorkarin Covid-19 positive dinhmun a tihchhuaha a lan danin, April 30, 2021 thleng khan Mizoramah Covid-19 vei mi 6,131 hmuh chhuah a ni a, kumin April thla bika hmuh chhuah 1,656 chu nikum March thla aṭanga kumin April thla tàwp thlenga hmuh chhuah aṭangin 27.01% a tling.

Kumin April thla hma lama Covid-19 positive hmuh chhuah tam ber thla chu November 2020 niin, mi 1,089 hmuh chhuah a ni a, record ding lai chu April 2021-a hmuh chhuah zat 1,656-in mi 567-in a khûm a ni.

April 2021-ah hian hripui vei mi 100 aia tam hmuh chhuah ni ni ruk a awm a; chu'ngte chu April ni 24-ah mi 105, ni 26-ah mi 103, ni 27-ah 228, ni 28-ah mi 138, ni 29-ah mi 140 leh ni 30-ah mi 112-te a ni.

Covid-19 positive enkawl mek tam lai ber pawh a thleng thar zel a, nimin khan enkawl mek mi 1,299 an tling tawh a ni.