KHAWTHLIR

Ruang hawpui
May 1, Inrinni zana Delhia Covid-19 vanga thi Eaward (Vanlaldika) (28) s/o H Thaliankapa, Champhai Vengthlang (Rahsi Veng) chu Mizoramah hawpui a ni dawn. Mizo Welfare Association, Delhi hruaitute hnen aṭanga thu dawn danin, Vanlaldika ruang hi nizan khan DDU aṭangin lak chhuah a ni a, thlahna hun hman a nih hnuah lirthei hmangin Mizoram pana chhuahpui a ni.

ICU-ah mi 10 awm
State Referral Hospital-ah nimin khan Covid-19 vei mi pasarih dah luh an ni a, mi pariat chhuahtir niin, mi pakhat a thi. SRH-ZMC Bulletin tarlan danin, nimin tlai dar 5 dinhmun angin, SRH-ah hripui vei enkawl mek mi 88 an awm a, mi 10 chu ICU-ah awmin, an zinga paruk chu ventilator hmantir an ni. Ward-ah mi 78 enkawl an ni a, an zinga 10 chu oxygen pek mek an ni.

Thisen pe
Mizo Students' Union, Lunglei chuan nimin khan Lunglei Civil Hospital blood bank-ah thisen unit 14 an pe a, petute mipa 13 leh hmeichhia pakhat an ni.

CM Relief Fund
Khatla Presbyterian Kohhran chuan nimin khan Mizoramin Covid-19 hri léng vanga harsatna a tawh mek laia ṭanpui ngaite ṭanpui nan Chief Minister's Relief Fund for Covid-19 ah Rs. 2,00,000 an chhûng lut. Chief secretary Lalnunmawia Chuaungo pawhin nimin vek khan Rs. 25,000 a pe bawk.

Exam dan tur rêl
Mizoram University thuneitu te, Mizoram Principal's Council hruaitu te, Mizoram College Teachers' Association aiawh leh zirlai aiawhte chu nimin khan MZU-ah an ṭhukhawm a, June 1, 2021-a MZU-in college exam a buatsaih tur chungchang an sawiho. Meeting-ah hian Covid-19 léng kara examination kalpui dan tur rawtna chi hrang hrang an siam a, MZU Vice Chancellor pawmpui turin an thlen nghal a ni.

Containment zone
Nimina Siahaa swab sample random test-ah Covid-19 vei mi eng emaw zat hmuh chhuah a nih avangin Bawrhsapin Siaha khawpui chu containment zone-ah nimin khan a puang.