Siahaa swab sample random test-ah Covid-19 vei mi 30 hmuh chhuah a ni

Mizoram sorkar thu angin Siaha khawpui hmun hrang hrangah Covid-19 darh dan hriatna turin nimin khan swab sample random test kalpui a ni a, Covid-19 vei mi 30 hmuh chhuah an ni.

Vanglaini palai zawhna chhangin Siaha chief medical officer (CMO) Dr C Hniechho chuan, Siahaah sample an endik tam theih ṭhin loh thu a sawi a, "Contact tracing a ṭanga rinhlelh leh mahni inringhlelte bak kan test meuh lo. Mizoram sorkar aṭangin random test ti tur hian lehkha kan dawng a, chumi bawhzui chuan kan buatsaih ta a ni," a ti.

Dr C Hniechho chuan, lockdown lai a nih avangin phalna neia mipui kal khawm tam deuhna tur hmunah random test buatsaih a nih thu sawiin, "Test duh an tam khawp a, a duh zawng zawng kan test kim thei lo zawk a ni," a ti a; test an tum zingah duh lo an awm loh thu a sawi.

Covid-19 vei mi 30 hmuh chhuah chu an rin lâwk bik loh avangin Covid-19 veite dahna tur hmanhmawh taka an buaipui nghal thu sawiin Siaha CMO chuan, "An tam tham deuh tawk si avangin a hmunhma tur buaipui pawh a buaithlak tham hle a ni," a ti.

Thu dawn danin, random test-ah hian Siaha College Venga test-ah hripui vei mi 18 hmuh chhuah niin, an zinga pahnih chu petrol pump-a thawk an ni a; New Colony-a test-ah mi 11 leh Vaihpi-a test-ah mi pakhat hmuh chhuah a ni bawk.

Nimina sample random test neih hma hian Siaha district-ah Covid-19 vei mek mi pali an awm a ni.