Covid-19 vanga thi awm belh

Mizoramah Covid-19 vanga thi nimin khan an awm belh a; James Lianmawia (55), Kanan Veng, Aizawl chu nimin tlai dar 4:15 khan SRH-ZMC-ah a thi a, Covid-19 vei Mizorama thi 17-na a ni.

Thu dawn danin, James Lianmawia hian Covid-19 a vei tih April 15, 2021 khan hmuh chhuah a ni a, SRH-ZMC-ah enkawl zui a ni. Damdawi-ina a awm hnuah stroke a nei tih hmuh a ni a, hun eng emaw chen ICU-a enkawl a nih hnuah nimin khan a thi a ni.

Kumin April thla hnuah Mizoramah Covid-19 vei thi mi paruk an awm tawh a, chu'ng zinga pathum chu Kanan Veng, Aizawl an ni.

James Lianmawia hma hian April 12-ah R Lalmuanzova, Kanan Veng, April 24-ah PC Zoram Sangliana, Kanan Veng, April 30-ah John Sapzinga, Champhai Vengthlang leh Lalthlamuanzuala, Armed Veng South leh, May 2-ah J Rawna, Damveng, Aizawl-te an lo thi tawh a ni.