Champhaiah Covid-19 do dan tur sawiho

Champhai District Task Force (DTF) chu nimin khan an chairman Maria CT Zuali, bawrhsap hoin DC conference hall-ah an ṭhu a; Covid-19 lêng donaa damdawi-in lam inpuahchahna leh Covid-19 vanga thite buaipui dan tur an sawiho.

Maria CT Zuali chuan, Champhai district chu ramri depa awm a nih avangin inthlahdah a thiang lo tih sawiin, "Hri léngin zual lam a pan zel avang leh Covid strain tharte a awm tâk zel avangin kan zavaia him tlànna atan sorkarin inkaihhruaina a siamte thuawih taka kan zawm hram hram a ngai," a ti a; inenkawlna hmunhma leh hmanraw neih dante hriat chian a, inpuahchahna tur leh hmalak zel dan turte ngaihtuah a ṭul thu a sawi.

Champhai District Hospital medical superintendent Dr Zatluanga tarlan danin, District Hospital-ah B-type oxygen cylinder 64, D-type oxygen cylinder 20 leh oxygen concentrator paruk a awm mek a; ICU-ah khum panga, ventillator panga leh oxygen line pahnih a awm mek a ni.

Champhai chief medical officer (CMO) Dr R Lianmawia sawi danin, tun dinhmunah Nursing School building-ah khum 64 awmna Covid care centre (CCC) leh khum 20 awmna dedicated covid health centre (DCHC) siam a ni a; Champhai CMO huam chhunga damdawi-in hrang hrangah B-type oxygen cylinder 108 a awm mek bawk.

Ṭhutkhawmah hian, Champhai District Disaster Management Authority (DDMA) hmalaknain May 5, Nilaini hian Champhai Vengthlang Primary School-II ah dawrkai, muṭia, mipui phur lirthei khalhtute leh filling station thawktute chu a tahtawla swab sample endiksak (random sampling) an rél.

Covid-19 vanga thi an awmin, thlanmuala inphûm nghal emaw, community hall/kohhran hall-a vuina tawi emaw neih hnuah a rang thei ang bera inphûm nghal zel ni se, an ti a; qurantine facility list kimchang tarlan a, mumal taka kalpui theih tura hmalak ni se, an ti bawk.