MNF-te hmasawn nasaah an inngai

MNF party chuan thuchhuah siamin, Serchhip biala MLA by-election-ah an candidate thlan tlin ni lo mah se, an party-in hma an sawn nasat thu an tarlang.

MNF chuan, inthlanna fel leh thianghlim taka neih a ni leh vote chhiar zawh thlenga buaina leh harsatna a awm lo chu lawmawm an tih thu an sawi a, "MNF candidate Pu Vanlalzawma a tling zo ta lo erawh pawi kan ti hle a, amah duhsaka vote-tu zawng zawng bakah, thlan tlin a nih theih nana thâ leh zung, ngaihtuahna sêngtute chungah lawmthu kan sawi a, Serchhip bial hmasawnna tura thlan tlin a ni ta lo hi pawi kan ti tak zet a ni," an ti.

Kum 1998 inthlanpuiah MNF candidate K Thangzuala thlan tlin a ni tih loh chu Serchhip bialah MNF an la tling ngai lo tih sawiin MNF chuan, "Inthlan hnuhnung ber kum 2018 khan ZPM-in vote 5,481 hmuin, Congress-in vote 5,071 an hmu a, MNF chuan vote 4,313 hmuin pathumna kan ni. Kum 2018 inthlan aṭanga kum hnih chhung leka vote 1,006 zeta MNF kan pun belh hi hmasawnna ropui takah kan ngai," an ti a; Congress-in vote 2,486 an hloh tâk chu ZPM-ah a kal nia an ngaih thu an sawi.

MNF party chuan, thlan tlin tâk Lalduhoma chungchangah, "ZPM candidate hmasa ber leh thlan tlin hmasa ber awmchhun, MLA atana lâk luh mai tur Pu Lalduhoma hi MNF chuan duhsakna a hlan a, dan bawhchhiat avanga paihthlaka awm Pu Lalduhoma hi, Serchhip bial mipuiin khaw­ngaihna leh ngaihdamna sang tak hmangin a bán leh a kaizâah dâwm kângin, a ṭhuthmun ngaiah an ṭhuttir leh dawn ta a. A campaign auhlate kha theihnghilh loin, Serchhip bial mipui tan a MLA fund mai bakah, Central lamah Serchhip bial hmasawnna atana sum hnûk chhuak ngei turin kan beiseipui nghal a ni," an ti.