Serchhipin Duhoma an thlang nawn leh hi a ropui ka ti - Hriata Chhangte

Serchhip biala MLA by-election neih zawh taka BJP candidate Lalhriatrenga Chhangte chuan, Serchhip bial mipuite'n Lalduhoma an thlang nawn leh chu ropui a tih thu a sawi.

Lalhriatrenga Chhangte hian nimin khan Serchhip Press Club-ah thuthar thehdarhtute a kâwm a; Assembly Speaker-in MLA aṭanga a bàn Lalduhoma thlan nawn leh ngat a ni chu ropui a tih thu sawiin, "Serchhip bial mipui chuan an bialtu MLA hi dan dik takin (technically valid) lo bàn pawh ni se, an pawm ve lo tih an tilang. Dikna leh huaisenna nen an thlang nawn leh a ni," a ti.

BJP a ni chungin bial mipuite'n thinhrik phah lo a, duhsaktu leh khawngaihtu mi 250 a nei tih sawiin Lalhriatrenga chuan, "Hei hian min tihphûr phah hle. Tun ṭum by-election hi chu Pu Duhoma leh MNF sorkar inbeihna lian tak a nih avangin min vote lotute pawh ka hrethiam lutuk," a ti a; by-election chu a tan hun ṭha a nih loh thu a sawi.

Lalhriatrenga Chhangte chuan, a tana ṭha tura thil engkim tihsaktu Pathian kutah a innghat tih sawiin, "Tun kum hnih leh a chanve chho chu Serchhip bialin Mizoram sorkara opposition MLA a neih leh bâkah, Serchhip bial mipui'n tisa, rilru leh thlarau lam thlenga hmasawnna tuipui chho zeltu tur central sorkara ruling mi leh sa an nei kawp dawn a ni," a ti.