Containment zone/area puang

Kolasib district bawrhsap Dr H Lalthlangliana chuan nimin khan Covid-19 hripui léng avangin Builum (Serlui) leh Chemlui inkar chu containment zone leh Jordan Centre, Seṭhawn chu containment area-ah a puang.

Kolasib DC thuchhuah chuan, Builum khuaa cheng mi eng emaw zatte inhlawhna ṭhina mi pakhat (contractor) chu Covid-19 vei a ni tih May 1, 2021 khan hmuh chhuah a nih avangin hri darh zau zel tur ven nan leh mipui him nan Builum (Serlui) leh Chemlui inkar chu containment zone-ah puan a nih thu a tarlang a, "Roenga, contractor leh a ṭhiante secondary contact zawng zawng chu lo inkhung tura hriattir an ni," a ti.

Covid-19 positive enkawlna hmun, Jordan Centre, Seṭhawn chu Covid care centre (CCC) atan puan a nih avangin Bawrhsap chuan, Jordan Centre main gate aṭang a ram chhung (compound) zawng chu containment area-ah a puang bawk.

Containment area/zone-ah Covid-19 kaihhnawiha official duty ni lo chu luhchhuah phal a ni lo a, mihring leh lirthei eng chi mah phalna nei lo tan kal phal a ni lo.