Minister-in oil depot siamna tur a en

Food, Civil Supplies & Consumer Affairs minister K Lalrinliana chuan nimin khan Bairabi-a tuialhthei dah khâwlna (oil depot) bunna tur a tlawh. Kolasib district-a inkhuahkhirhna kalpui dan leh screening point-a Covid-19 vei hmuh chhuahte Jordan Centre, Seṭhawna enkawl dan turah bawrhsap Dr H Lalthlangliana a

kâwm bawk.

K Lalrinliana chuan, Kolasib District Hospital tan dialysis khawl ruahman a nih thu sawiin, "Natna hrang hrang vanga dialysis tih ngai mi ṭhahnem takin sum tam tak séngin Aizawl an pan ṭhin a, hei vang hian District Hospital-ah dialysis tihna khawl pathum dahna turin ruahmanna ka siam," a ti a; kum 45 hnuai lamte'n Covid-19 vaccine an lâk theihna turin Mizoram sorkar a inbuatsaih mek thu a sawi.

Sorkar thuchhuah tarlan danin, Bairabi-a oil depot bunna tura ram mamawh zawng zawng chu Kolasib DC Office hmalaknaa endik vek tawh a ni a, a ṭul anga bawhzui a nih theih nan March 2021 khan Departmental Land Selection and Purchased Board hnenah thawn a ni tawh. Hemi atan hian ram 46.70 acre-a zau, mi 26-te hming a awm chu endik tawh a ni bawk.