Congress party-in Duhoma lawmpui

Mizoram Pradesh Congress Committee (MPCC) chuan thuchhuah siamin, Serchhip bial by-election neih zawh taka thlan tlin Lalduhoma chu an lawmpui tak zet thu an tarlang a, "Serchhip bial mipui duh thlanna hi kan pawm a, a zahawm kan ti hle a ni," an ti.

MPCC chuan, by-election neih a ṭul chhante leh a boruak thlirin, Congress party tan tlin a harsa dawn a ni tih hre reng chunga an party tana pên chhuak, INC candidate PC Laltlansanga an chhuan thu sawiin, a thawhrimna leh a tih tak taknate chu Pathianin mal a la sàwm ngei an rin thu an tarlang.

Congress party phatsan loa ṭan tlattu ṭhahnem tak an nei reng chu an party inrêlbàwlna nghehzia tilang chiangtu a nih thu sawiin MPCC chuan, "Party mi rinawm tak takte hi kan ngai hluin kan thlamuanpui em em che u. Ṭhahnemngai taka thawktu headquarters, district, block leh unit hrang hrang hruaitute leh worker zawng zawng kan chhuang hle," an ti.

Congress party chuan, "Mizoram mipuite'n malsawmna an dawn theih nana Pathianin Congress party a lo hman ṭangkai tawh dan te, Mizoram hmasawn nan leh remna leh muanna a thlen theihna atana Congress party hnathawh tawhte thlirin, a hun takah Pathianin min la hûng chhuak leh ngei dawn a ni," an ti a; Congress party chu Pathian malsawm tlakin a insiam ṭha mek zel niin an sawi.