Health Minister thuchah: Kaihhruaina zâwm turin mipui ngen Hripui veite enkawlna a indaih lo ṭan

Health minister Dr R Lalthangliana chuan, India hmarchhak state zingah Mizoram chu Assam tih loha Covid-19 vei pun chakna ber a nih thu sawiin, sorkarin inkaihhruaina a siamte ṭha taka zâwm turin mipui a ngen. Hetih lai hian, May 3-a Dr ZR Thiamsanga, MLA leh Aizawl City Local Council Association (ACLCA) hruaitute inkawmnaah Covid-19 veite enkawlna hmunin a daih loh ṭan thu sawi a ni.

Health Minister chuan nimin khan thuchah a tichhuak a, "Kan state-a Covid-19 case pun chak dan leh kalhmang enin, kan dinhmun a ṭha lo ta tak zet. Hetiang zela kan kal chuan intuamhlâwm thei lo dinhmunah kan lut thuai ang tih a hlauhawm hle," a ti.

Dr R Lalthangliana chuan, "Tun May thlaah ni thum chhung lekin mi 425 hmuh chhuah tawh a ni a, nunna chán pawh mi pali kan neih belh. India hmarchhak state zingah pawh kan dinhmun a ṭha lo sâwt ta hle a, Assam tih lohah chuan case pun chakna ber kan ni ta hial," a ti a; kumin March thlaah Covid-19 positive mi 53 hmuh chhuah a nih laiin, April thlaah mi 1,655 hmuh a nih thu a sawi.

Khauh lehzuala chawlhkar khat dang inkhuahkhirh tur chungchangah Minister chuan, "Ngaihdan tam tak a awm thei ang, ṭhenkhatin a khauh tâwk lo an ti a ni thei a, ṭhenkhat tan a rip lutuk thei bawk. Kil tin aṭanga teh hnua kan zawh tâwk leh ṭhatpui tlàn theih tur, min hrût rual thei tur ang bera ruahman a ni," a ti a; mi dang hriatthiamna nen ṭha taka inkaihhruaina zâwm turin mipui a chah.

Dr R Lalthangliana chuan, Mizoram dinhmun a khirh zel thu leh health infra­structure-in a zawh loh hun a thlen a hlauh­awm thu sawiin, "Community transmission hian kan zingah bu a khuar thûk tawh hle tih kan hriat tlân a ngai. Khawpui chauh ni lo, thingtlang kilkhâwr zawka kan ngaihahte pawh kàina chin hriat loh an awm ta nawlh nawlh mai. Khawi lai mah hi a him bik e tia han sawi ngam tur a awm ta lo," a ti.

Minister chuan, Covid vaccine leh endikna hmanruate lei tur hmuh a harsa tawh a, black-a lei tur pawh a vàn tawh thu te, doctor leh nurse-te an fimkhur rualin mipuiin an fimkhur pui ve a ngaih thu te, CM Relief Fund-ah mi thilphalte'n pawisa an thawh ṭhin avanga sorkar a lawm hle tih a sawi bawk.

Pathian hnenah nasa lehzuala ṭawngṭai tur leh malsawmna dawng tlâka mahni hmun ṭheuhah ṭan la turin Health Minister chuan mipui a ngen a ni.

Covid-19 Medical Operation Team chairman Dr ZR Thiamsanga leh ACLCA Thawhṭannia an inkawmnaah hian, Covid-19 veite enkawlna hmun a indaih loh ṭan avangin community covid care centre (CCCC) mamawhna a san tawh hle thu sawi a ni a; veng tina local task force (LTF)-te chu CCCC din tura ngenin, "CCCC hi veng tinah din a harsa thei a, veng inhnaih deuhte chu inpeizâwna ruahmanna siam tura ngen an ni," an ti.

Dinhmun thlirin, home isolation pawh tih a ngai nia an hriat thu an sawi a, "Home isolation SOP hi ṭha taka duan ran ni se, LTF hnenah hriattir vat theih ni se," an ti. ACLCA ngenna angin Covid-19 laka invênna tur leh tih tur leh tih loh turte veng tin chanchinbua chhuah an rél a, chhuah tur buatsaih chu MOT kutah an dah a ni.