Khauh leh zuala kalpui turin MKHC-in Chief Minister an ngen

Mizoram Kohhran Hruaitute Committee (MKHC) hruaitute chuan chief minister Zo­ramthanga chu nimin khan a pisaah an kâwm a; Covid-19 hri léng laka mipui him nan leh hri darh zel chhut chah nan khauh zawka inkaihhruaina kalpui turin an ngen.

MKHC hruaitute chuan, Mizo­rama Covid-19 vei pun dan enin, sorkar chu hun rei lo te chhung khauh leh zuala a kal a ngai nia an hriat thu leh, chhuanchham leh ei leh bâra harsatna tâwk an awm loh nan kohhrante'n theihtawp chhuah an inhuam thu an sawi.

MKHC hruaitute chuan, "Thing­tlang hmun ṭhenkhat, hri léng boruak a ziaawm zawknaah chuan thlai chi tuh hun lai a nih avangin inthlahdul a rem zawk thei a, mahse, khawpui hrang hrang, hri vei an pun zelnaahte chuan hun eng nge maw chen chu khauh taka inkhuahkhirhna kalpui a ṭul niin kan hria," an ti.

CM Zoramthanga chuan, MKHC rawtna chu ṭha a tih thu leh a ṭâwmpui thu sawiin, an rawtnate chu sorkarin a ngaihtuah zui turin buatsaih a, thehlut turin a ngen a, "Heng hun khirh tak kan tawn lai hian khawsak harsa zawkte'n ni tin mamawh lama an mangan lohna turin sorkar, kohhran leh tlawmngai pawlte kan ṭanho a pawimawh a ni," a ti a; kohhran hruaitute inhuamna chu lawmawm a tih thu a sawi.

Chief Minister chuan, Covid-19 vei enkawlna lama mamawh hrang hrang Mizoramin a neihte chu sorkarin a ṭul ang ang lei tura phalna a pek thu a sawi bawk.