SRH-ah oxygen hman man bithliah

State Referal Hospital (SRH) medical superintendent Dr HC Laldina chuan nimin khan hriattirna (notification) a tichhuak a, SRH-a damlo awm, oxygen hmangte aṭangin a man lâk tawh tur a nih thu a tarlang. Hetihlai hian SRH hi a thlawna oxygen supply-tu an awm.

Medical superintendent thuchhuahah chuan, tun dinhmunah ram pum leh Mizoramah pawh oxygen mamawhna a nasa a, indaih lohna a pung zel tih tarlangin, "Oxygen atan sum tam tak sen a ngai mek a ni. Chuvangin, tun aṭanga thu leh awm hma chuan oxygen hman man lak tawh tur a ni. Oxygen hman man hi Rogi Kalyan Samiti (RKS) account-ah a lut ang," a ti.

Oxygen hman man chu Covid-19 vei ni lo tan darkar khatah Rs. 30 a ni a; Covid-19 vei tan chuan litre 5 thleng darkar khatah Rs. 50, litre 5-12 inkar hmanin darkar khatah Rs. 75 a ni. Ventilator hman man chu darkar khatah Rs. 120 a ni bawk.

FK Oxygen Plant chuan April thla khan State Referral Hospital (ZMC)-a oxygen hman tur chu April leh May thla chhung a thlâwna an pek tur thu an lo puang tawh. Zawhna chhangin FK Oxygen Plant enkawltute chuan ni tin trip thum vel SRH hian an plant aṭangin oxygen an la lâk chhunzawm thu an sawi.