KHAWTHLIR
Chawimawina hlân
MHIP Gen.Hqrs chuan thuchhuah siamin, hripui léng vanga mipui an rálṭit em em laia CT Ramnunmawii, Rualtlang-in Covid-19 vei Lalsiami, kum 93 mi enkawl tura a inpe chu ropui an tih thu leh an chhuan thu an tarlang a; an ngaihhlutzia leh chawimawina lantir nan Rs. 3,000 an hlan. MHIP chuan, "Kan hun tawn khirh takah hian theihtawpa fimkhur leh ṭawngṭai chungin, kan phâk tâwk ṭheuhin mi dangte tan malsawmna, ṭanpuitu nih tum ṭheuh ang u," an ti.
Thisen pe
State NSS Cell chuan nimin khan Civil Hospital, Aizawl Blood Bank-ah thisen pek an huaihawt a, zirna-in hrang hranga NSS volunteer-te'n thisen unit 32 an pe. Thisen petute chu J Thankima College NSS aṭangin mi 19, Chaltlang HSS aṭangin mi pasarih leh Helen Lowry HSS aṭangin mi paruk an ni.
Bill pekna hawng
Lawngtlai DC Dr Andrew H Vanlaldika chuan nimin khan DC conference hall-ah online-a tui bill pekna a tlangzarh. Tui bill hi PHE online payment portal www.phedmizoram.in/billpayment.php-ah emaw, BHIM, Paytm, PhonePe leh Google Pay apps emaw hmanga pek theih a ni.
SDA-in sawn turin ngen
Seventh Day Adventist Mizo Conference chuan, Covid-19 avanga inkaihhruaina siam tharah phalna bik nei lo dawr hawn hun atan Inrinni chiah phal a ni chu tidanglam turin nimin khan Chief Minister hnenah an ngen. 7th Day Adventist hruaitute chuan, Inrinni chu an kohhran ni serh a nih avangin inkaihhruaina tihdanglam an duh a ni. CM thurawn angin nimin vêk khan Chief Secretary hnenah ngenna lehkha an thehlut nghal.
Ventilator hmantir Mi 8 an awm mek
State Referral Hospital-ah Covid-19 vei enkawl mek mi 75 an awm mek a, chu'ng zinga mi 13 chu ICU-ah enkawl niin, ventilator hmantir mek mi pariat an awm. SRH-ZMC Bulletin tarlan danin, SRH-ah hian hripui vei ward-a enkawl mi 62 awmin, an zinga pakua chu oxygen pek mek an ni.