Lungleiah kal zel dan tur sawiho a ni

Lunglei DC Kulothungan A kaihhruaiin May 3, Thawhṭanni khan Lunglei Convention Centre-ah District Task Force (DTF) leh khawpui chhunga village task force (VTF) hruaitute an ṭhukhawm a, inkhuahkhirhna kalpui zel dan tur an sawiho.

Bawrhsap chuan, Covid-19 léngin zual lam a pan zel thu sawiin, "Kan himna tura sorkarin dan zawm tur a duante mipuiin kan zawm hram hram a ngai. Inkhuahkhirna hi mumal taka kalpui a nih theih nan veng hrang hrangte'n kalphung inang tlanga thupek an kenkawh a ṭul a ni," a ti.

Civil Hospital, Lunglei medical superintendent Dr SR Ngurchamliana tarlan danin, Lunglei district-ah oxygen dinhmun a ṭha a, Civil Hospital-a oxygen khawlpui, boruak aṭanga oxygen siam chhuak thei (oxygen generating plant) hman mek a nih bakah, oxygen refilling and distribution centre pawh Lunglei district tan siam tum a ni.

Lunglei chief medical officer Dr LC Liana tarlan danin, tun hnaia an district chhung Tlabung khuaah Covid-19 vei mi 30 chuang hmuh chhuah a nih avangin chhui zui hna ngawrh taka kalpui mek a ni.

Ṭhutkhawma tarlan danin, tun dinhmunah Lunglei SIRD CCC-ah mi 26, Tlabung Tourist Lodge CCC-ah mi 25 enkawl mek an ni a; home quarantine mek mi 79 an awm a, 2nd Bn. MAP mi leh sa khung hran mek mi 41 leh 199 BSF mi leh sa khung hran mek mi 36 an awm bawk.