May thlaah pre-matric scho' pek beisei Post-matric scho' pek hun tur hre thei lo

Mizoram Scholarship Board (MSB) chuan kumin May thla chawhma lamah pre-matric scholarship pek chhuah a tum a, post-matric scholarship pek theih hun tur an hre lo thung.

MSB nodal officer Lalmuankima Sailo chuan Vanglaini palai zawhna chhangin, pre-matric scholarship chungchangah Mizoram Public Financial Management (PFM) hotute nen indawr a la ngaih thu a sawi a, "Covid-19 boruak avangin kan la inhmu thei lo a, chumi a fel chuan May thla tir lamah kan pek theih ka ring," a ti.

Lalmuankima Sailo chuan, pre-matric scholarship tur cheng nuai 460 an neih tawh thu sawiin, "A dil zawng zawng hi mi 12,000 vel an ni," a ti a, dil zawng zawngte pek tur daih chu an dawn tawh thu a sawi.

Post-matric scholarship first instalment-a pek tur May 6, 2020 a sanction tawh chu Finance deptt. aṭangin an la hmuh loh thu sawiin Lalmuankima Sailo chuan, "Finance department lamah Covid-19 positive an awm avangin an hna a khaihlak deuh niin kan hria, engtikah nge min pek chhuah theih dawn kan la hre lo," a ti.

Lalmuankima Sailo chuan, post-matric scholarship atan cheng nuai 3,400 vel an mamawh thu leh first intsalment atan cheng nuai 1761 an dawn tawh thu a sawi a; first instalment an pek hnuah chauh sorkar laipui aṭangin second instalment tur an dawn tur thu leh post-matric scholarship dil 32,000 vel an awm thu a sawi bawk.

MSB Nodal Officer chuan, pre/post-scho­larship chungchangah document fel lo tam tak a awm thu sawiin, "Tunah pawh spot verification tih tur eng emaw zat kan la nei. Income an ziah leh document rinhlelhawm a tam a, hnâwl leh chhui chian ngai eng emaw zat kan nei," a ti a; dilna 1,799 an hnâwl tawh thu a sawi a ni.