Champhaia random test-ah Covid-19 vei hmu chhuak lo; Sample random test tihtâwp a ni

Champhai District Task Force on Covid-19 member-te May 3, Thawhṭannia ṭhukhawmin an rêl angin, nimin khan Champhai khawpuiah vantlanga Covid-19 a darh nasat dan hriatna atan swab sample random endik rûnpui neih a ni a, hripui vei hmuh chhuah a ni lo.

Hetihlai hian random test hi Mizoram pumah tihtawp a ni tawh dawn.

Champhai aṭanga thu dawn danin, Champhaia mipui nena inhnîm hnai zual maxicab khalhtu, taxi khalhtu, auto-rickshaw khalhtu, sumdawng, dâwr nghaktu, village task force member leh filling station-a thawk ṭhenkhatte sample RAT hmangin endik a ni a; endik zawng zawng mi 123 zingah hripui vei an awm lo.

Champhai district-ah hian nimin thleng khan swab sample RAT hmangin 9,352, TrueNAT-PCR hmangin 1,056 leh RT-PCR hmangin 1,476, a vaiin sample 11,884 endik a ni tawh a; Covid-19 vei mi 122 hmuh chhuah tawh a ni.

Health & Family Welfare secretary R Lalramnghaka chuan nimin khan district hrang hranga chief medical officer (CMO)-te chu Covid-19 darh nasat dan hriatna tura swab sample random test kalpui tawh lo turin a hriattir.

Vanglaini thu dawn danin, May 3, Thawhṭannia Siaha khawpuia random test neih ṭumin hripui vei mi 30 hmuh chhuah a ni a, hei hian vantlangah hripui a darh ngei a ni tih a finfiaha ngaih a nih avangin random test chu kalpui a ṭul tawh loa ngaih a ni.

Tarlan tawh angin, State Disaster Management Authority (SDMA) hnuaia State Executive Committee chairman Lalnunmawia Chuaungo, chief secretary chuan, Covid-19 random test nei turin April 30 khan Health & Family Welfare department a hriattir a; HFW department lamin CMO-te chu an district-ah ramdom test ti turin an hriattir leh chhâwng bawk.

Random test neih tura tih a nih chhan chu, mipui vantlangah hripui a darh zau tawh dan hriat nan leh hmalak zel dan tur ruahmanna siam kawnga thuneitute pui turin a ni.