Exam turte'n internet-ah harsatna An tawh loh nan hma la turin ngen

Mizo Students’ Union (MSU) Gen. Hqrs chuan, June 2, 2021 aṭangin online hmanga university exam a ngai ngei dawna a lan avangin, zirlaite'n internet lamah harsatna an tawh loh nan hma la thuai turin sorkar thuneitute an ngen.

MSU thuchhuah chuan, May 3, Thawhlehnia sorkar laipuia Ministry of Education hnuaia Department of Higher Education leh Mizoram University Examination department-te thuchhuak angin, university exam chu Covid-19 lêng vangin offline-a neih phal a ni lo a, online hmangin neih tur a nih thu a tarlang a, "June 2 aṭanga MZU hnuaia exam turte dinhmun a ngaihtuahawm hlein kan hria. Mizorama internet service chhiat dan ngaihtuahin, zirlai tam zawkte chu an dinhmun a chhe hle dawn niin kan ngai," an ti.

MSU chuan, "MZU Examination department thuchhuaha zirlai online-a exam turte internet awmna ngeia an awm a ngaih thu leh internet awm lohna vanga harsatna awm thei an buaipui loh tur thu tarlan a ni chu Mizoram hmun hrang hranga zirlaite dinhmun ngaihtuahin àwm lo kan ti," an ti a; MZU thuneitute chu zirlaite dinhmun ngaihtuaha hma la turin an ngen.

MSU hian Ministry of Education leh MZU thuchhuakte avang hian zirlai exam turte'n harsatna an tawh loh nan a rang thei ang bera hma la turin ICT Minister leh Chief Secretary an ngen bawk.