Covid-19 darh nasa hi sorkar inthlahdah vang - Congress ṭhalai

Congress party ṭhalaite chuan thuchhuah siamin, Mizorama Covid-19 nasa taka a darh ta chu pawi an tih thu leh Mizoram sorkar inthlahdah rei vanga an ngaih thu an tarlang.

MPYCC chuan, khawvel pumah Covid-19 thawh khatna nikuma a lên laiin mithiamte'n thawh hnihna leh thawh thumna a thlen tur thu an sawi ṭhin chu ngaihthahah Mizoram sorkar an puh a, "Mizoram khawtlangah nasa taka a ṭâi darh ta hi pawi kan ti takzet. Kumin bikah Mizoram luhnaa hun rei tak sorkar inthlah dah luat vanga hetiang dinhmun kan thleng ta hi a pawi hle a, sorkar inthlahdah vang a ni," an ti.

State ṭhenawma Covid-19 second wave nasa taka a lên tawh laiin Mizoram ramri-ah sorkarin RAT test a duhtâwk a, RAT-in negative-a a hmuh zingah hripui vei an tam tih sawiin MPYCC chuan, "RAT hi rinráwla kan hman avangin nasa takin kan tuar ta a ni. RAT negative-te hun rei tak quarantine mumal an nih loh avangin tun dinhmun hi kan thleng ta ni a tih theih," an ti a; sorkar chu mipui dem lo a, a thiam lohna pawm turin an chah.

Congress ṭhalaite chuan, hripui a lèn aṭanga kum khat a liam hnuah pawh ZMC-a bungruate tihchangtlun a la ni mang lo tih sawiin, "Sorkarin a ngaihthahzia tilangtu a ni. Hripui lên hmasak aṭanga vawiin thlenga ZMC lama ventilator leh ICU-te thuam mumal a la ni lo leh district hospital thuam chak a ni lo hi sorkarin a mawhphurhna a ngaihthahzia lantirtu a ni," an ti.

MPYCC chuan, Covid-19 vei mek leh mipui (population) zat chhûtin, Mizoram chu hmarchhak state zingah dinhmun ṭha lo ber a nih thu an sawi a; chuvang chuan MNF sorkar, a bikin Health Minister chu hripui donaah mi chak leh remhriaa chhuah fo chi a ni lo niin an sawi bawk.