Covid-19 atan thawhlawm thawh turin Mizoram sorkarin a hnathawkte a ngen : FMGEW-in vawiinah an ngaihtuah dawn

Sorkar hnathawk pawl hrang hrang inzawmkhawmna, Federation of Mizoram Govern­ment Employees & Wokers (FMGEW) chu Mizoram sor­karin Covid-19 dona atana thawhlawm thawh turin a ngen a; chumi chungchang chu FMGEW-in vawiin hian Vanapa Hall-ah an ngaihtuah dawn.

FMGEW hruaitute hnen aṭanga Vanglaini thu dawn danin, tun hnai khan chief secretary Lalnunmawia, additional chief secretary JC Ramthanga leh Finance department hotute chuan FMGEW hruaitute an kâwm a; Mizoram sorkar chuan a sum dinhmun a ṭha lo nia sawiin, Covid-19 dona atana ṭanpui tura puihna an dil a ni.

Sorkar hnathawkte hian sumin sorkar an pui thei a nih chuanin, an puihna sumte chu Covid-19 dona atan liau liaua hman tur a nih thu FMGEW hruaitute chu hrilh an ni.

Zawhna chhangin FMGEW hruaitute chuan, sorkar ngenna chu anmahni thua remtih ngawt chi a nih loh thu an sawi a, "Association hrang hrang awmkhawm kan ni a, an ngaihdan lak khawm a ngai. Chuvangin, sawihona hun buatsaih a ngai a ni," an ti.

FMGEW hian an hnuaia sorkar hnathawk pawl hrang hrang aiawhte chu Covid-19 dona atana sorkar ṭanpuina tur sum thawh chungchang sawipui turin vawiin hian Vanapa Hall-ah an ko khawm a; Disaster Management & Rehabilitation Secretary pawhin inhmuh khawm phalna a pe tawh.

Inhmuhkhawmnaah hian pawl tin aṭangin aiawh pakhat ṭheuh tel tur a ni a, kal khawm­naah mi 100 aia tam tel phal a ni lo thung. FMGEW chuan páwl aiawha inhmuhkhawmnaa tel turte chu an páwl ngaihdan leh inhuam dante hre saa kal turin an ngen.