AMC-in lockdown pawhsei an duh : Councillor-te Rs 1,00,000 pek a ni dawn
Aizawl Municipal Corporation (AMC) chuan Covid-19 darh zel avangin Aizawl khawpuiah inkharkhip (lockdown) khauh zawka kalpui zel an duh. Hetih lai hian, Covid-19 dona atan AMC councillor-te chu Rs. 1,00,000 ṭheuh pek an ni dawn.
May 4, Thawhlehni zana online hmanga AMC Executive Council meeting chuan, AMC huam chhungah khauh zawka inkhârkhip kalpui mek chu chhunzawm zel ṭha an ti a, Chief Minister hnena ngenna thlen turin Mayor an ruat. An rorel bawhzuiin mayor Lalrinenga Sailo chuan nimin khan CM Zoramthanga hnenah ziakin inkharkhip pawhsei an duh thu a thlen a ni.
Lalrinenga Sailo chuan, Chief Minister hnenah hian India ram hmun dang leh Mizoramah, a bikin Aizawl khawpui chu Covid-19 thawh hnihnain a tihbuai nasat thu a tarlang a, "Ni tin hri vei hmuh chhuah an pung zel a ni. Hri lêng hi sorkar leh mipuiin chak zawka kan do theihna atan leh a darh zel tur awmze nei zawka tihtawp a nih theihna atan AMC area-a kalpui mek hi chhunzawm zel turin ka ngen a che," a ti.
Aizawl Mayor chuan, Covid-19 laka mipui him theihna tura kawng hrang hranga Mizoram sorkar leh CM hmalakna chu thlamuanthlak an tih thu CM a hrilh nghal.
Vanglaini palai zawhna chhangin Lalrinenga Sailo chuan, AMC huam chhungah hmasawnna kawng hrang hrang thawh hleih theih a ni lo tih a sawi a, "Hmasawnna aiin keini chuan Aizawl mipui dam khawchhuahna kan ngai pawimawh ber," a ti a; Aizawl mipuite chu an lo tuar deuh a nih pawha dawh hrâm hrâm turin a ngen.
Aizawl Mayor chuan, Covid-19 donaah AMC-in theihtawp a chhuah tih sawiin, "Councillor-te'n an ward chhunga Covid-19 dona atana an hman turin Executive Council chuan Rs. 1,00,000 ṭheuh pek a remti. Covid-19 veite enkawlna hmun indaih lohna a awm ṭan avangin councillor-te chu mahni ward ṭheuhah Covid community care centre din a nih theihna atana hma la turin kan inngen a ni," a ti.