Covid-19 veite enkawlna atan Damdawi ṭha ber a awm rih lo

Nimin khan Health minister Dr R Lalthang­liana hoin sorkar official leh doctor chi hrang hrang (pension tawh, la thawk mek leh mimal damdawi-ina thawk)-te'n Covid-19 chungchang an sawiho. Doctor-te chuan, Covid-19 veite enkawlna atan damdawi ṭha ber sawi tur a awm rih loh thu an sawi.

Minister chuan, Co­vid-19 vei an pun zel bak­ah, natna (symp­tom) lang a hma aiin an tam thu sawiin, "Hei hian hripui veite enkawl kawngah harsatna a siam ṭan. Damlo enkawl dan turah ngaihtuahna uluk taka sèn a ṭul a, kum hmasa aiin nasa takin kan ṭan tlân a ngai a ni," a ti.

Ṭhutkhawmah hian Covid hrik thahna dam­dawi bik hmuh chhuah a la nih loh avangin mipui tan damdawi ei ve leh inenkawl danah fimkhur a ṭulnate inzirtir a ṭul thu sawi a ni a; a ṭul angin rang taka hmalak ṭha an ti.

Tun hnaia Covid-19 vei hmuh chhuah thar zingah kum 60 chung lam an tlém tawh a, ṭhalai leh naupang zingah an pung chak thung. Naupang kum 10 hnuai lam positive an pung chuan chhungkuaah an inkài darh nasa tih a tilangah an ngai.

Doctor-te chuan, tuna hripui vei pun dan enin, hun eng emaw chen chu ni tin CCC/ CCCC-ah mi 400 vel dah luh belh reng tura inhisàp a ngai nia an hriat thu an sawi.

Ṭhutkhawmnaa doctor-te thusawi
1) Covid-19 hian a tlangláwn berah chuap a khawih nasa a, a tivúng
2) Chuap a chhiat chuan pneumonia vei a awlsam
3) Lung (heart) a khawih nasa a, thisen a tikhal thei
4) Thisen zám pahnih artery leh vein-te a block duh avangin heart attack leh stroke a thlen thei
5) Lungphu a tihran avangin lungphu ṭha lo a thlen thei
6) Covid-19 veiten oxygen an tlâkchham a hlauhawm
7) Oxygen tlâkchhamin lung, kal (kidney) leh thluak a tichhe thei
8) Covid-19 enkawlna atan damdawi ṭha ber sawi tur a awm rih lo