Mizoram Synod-in kum 2020 chhungin Ṭanpuina cheng nuai 88 a pe chhuak
Mizoram Presbyterian Kohhran chuan kum 2020-21 (financial year) chhung khan Relief Fund aṭangin cheng nuai 88 an sem chhuak a; hei hi ṭanpuina sem chhuah tur budget-a an dah aiin a tam zawk.
Mizoram Synod-in ṭanpuina pekte chu damlo, in kâng tuar, leimin tuar, lirnghing tuar, Covid-19 kaihhnawih leh vanduaina hrang hrang tuarte an ni a; an pek zingah hian an kohhran (Presbyterian) mi lo eng emaw zat an tel.
Synod hian Covid-19 do nan nikum khan CM Relief Fund-ah Rs. 9,00,000 an thawh a, March-June 2020 chhungin Covid-19 vanga khawsak harsa nia hriat mi eng emaw zat hnenah Rs. 6,00,000 a sem.
July 2020 chhung khan ṭanpuina hrang hrang - Covid-19 vang leh chhiatna dang dang vanga harsatna tawkte puih nan Rs. 39,13,750 an hmang a; Mizoram khawchhak lama lirnghing tuarte puih nan khaw hrang hrangah August 2020 khan Rs. 8,89,000 an pe bawk.
Mizoram Synod hian ṭanpuina leh chhawmdawlna atana hman turin Relief Fund a nei a, chutah chuan budget-ah kum khat atan Rs. 70,00,000 an dah ṭhin. Kum 2020-21 chhungin cheng nuai 88 an sem chhuah avangin, budget-a dah aia tam a hmang a ni. Budget-a sum dah aia tam an sem chhuah chhan hi Covid-19 a lên avang leh khawchhak lama lirnghing vang a ni.
Kum 2020-21 chhunga Synod-in ṭanpuina a pek zinga a tam ber chu damlo, in kâng leh vanduaina dang - thlipui leh rial vanga harsatna tâwk te, leimin leh khuarêl chhiatna avanga harsatna tâwkte an ni. Nikuma ramri buai avanga vanduaina tâwk leh hliamte hnenah ṭanpuina an pek bakah, ramria hma latu pawl ṭhenkhat hnenah puihna an pe bawk.