KHAWTHLIR

RAT tih phalna pe
Health & Family Welfare department chuan, Aizawla Kulikawn Hospital leh Redeem Hospital leh, Lungleia Christian Hospital-te chu swab sample endikna, Rapid Antigen Test (RAT) kalpui turin phalna a pe. RAT kalpui phalna pek thar damdawi-inte chu Covid-19 kaihhnawiha inkaihhruaina hrang hrangte zâwm turin sorkar chuan a hriattir nghal bawk.

Thisen pe
Tuithiang Branch YMA chuan an din champha vawi 33-na pualin nimin khan an YMA Hall-ah thisen pek an huaihawt a, Civil Hospital, Aizawl tan thisen unit 73 an pe a, petute mipa 61 leh hmeichhia 12 an ni. KṬP, Kolasib Hmarveng Branch chuan May 5-7 chhungin District Hospital-ah thisen an pe dawn a, nimin khan pe ṭanin, mi pangain an pe a ni.

CM Relief Fund
UPC North East India kohhran chuan nimin khan Covid-19 donaa hman turin Chief Minister's Relief Fund-ah Rs. 8,00,000 an thawh. May 4, Thawhlehni khan Mizoram Rural Bank pawhin Rs. 10,00,000 an pe bawk. Nimin thlenga Covid-19 dona tura CM Relief Fund-a sum awm zat chu Rs. 1,23,34,984 a ni.

Sub-centre tlawh
AMC ward XIV councillor Ramthanzauvi chuan nimin khan a bial chhung, Mission Vengthlanga Health Sub-Centre a tlawh a, an mamawh leh harsatna a hnena an thlente chu tihhlawhtlinsak ngei a tum thu a sawi. Mission Vengthlang Sub Centre-ah hian thawktu health & wellness officer pakhat, health worker pathum, 4th grade pakhat leh ASHA pakhat an awm mek a ni.

SRH-ah mi 10-in Ventilator hmang
State Referral Hospital-ah Covid-19 vei ICU-a enkawl mek mi 11 an awm a, chu'ng zinga mi 10 chu ventilator hmantir an ni. SRH-ZMC Bulletin tarlan danin, SRH-ah hian nimin khan Covid-19 vei mi 14 dah luh an ni a, anni nen nimin tlai dar 5 khan hripui vei mi 100 an awm mek. Nimin khan ICU-ah mi pakhat dah luh a nih laiin, ICU awm mi pathum chu ward-ah sawn an ni. Ward-ah mi 89 an awm a, chu'ng zinga mi 14 chu oxygen pek mek an ni.