Health Minister-in CCC tur a enfiah

Health minister Dr R Lalthangliana chuan nimin khan Covid care centre (CCC) atana rawt in ṭhenkhat a hmunah a enfiah a; Covid-19 vei na zualte tan oxygen leh ventilator lamah ṭan an la zel niin a sawi.

Health Minister hian CCC atana rawt pakhat, New Capital Complex-a Mizoram Rural Bank (MRB) Head Office sak thar a enfiah a; in hi chhâwng sarih, inthiarna, tui leh power supply-te ṭhatna a nih avangin Covid-19 veite enkawl nan hman ngei a duh thu a sawi. Agriculture directorate building erawh chu a hlui tawh avangin hman chi lohah a ngai thung.

Dr R Lalthangliana chuan, Aizawl chu Mizorama hripui hluarna ber a nih avangin CCC leh CCCC tur an dap belh zel tih a sawi a, "Medical team thlengin ngaihtuah belh zel an ngai a, MKHC-te nen kan indàwr zel. Damlo serious bik tan oxygen leh ventilator-ah ṭan kan la zel a, Chief Minister pawhin hriatthiamna sang tak a nei zel a, mamawh kan thlente min pawmsak zel a ni," a ti.

Covid-19 donaah nikum aiin tunah nasa zawka ṭan lak a ngaih thu sawiin R Lalthangliana chuan, ṭul tàwpkhâwk loah zin chhuak lo tur leh, ram páwnah phei chuan zin lo tawp rih turin mipui a ngen.

HFW Minister chuan, "Kumin January-March chho vel khan kan lo inthlahdah hman a, inkhawmte kan phal a, puanven i sâwi chhíng ang u. Tunah hian Kânhmun, Vairengte leh Myanmar nen kan inrìna hrang hrang, Manipur ramri thlengin theihtawp chhuahin kan invêng uluk hle a ni," a ti.

Health Minister hi Medical Operation Team chairman Dr ZR Thiamsanga, MLA leh a kaihhnawih department-a sorkar official-te'n an ṭawiawm a ni.