Champhai leileta in sak ṭhiat dawn In satute pawisa chawitir dawn lo

Champhai leileta dan kalha kudam sakte chu leilet neitute'n an ṭhiat dawn a, pawisa erawh chawitir an ni dawn lo.

Champhai DC Maria CT Zuali chuan Vanglaini palai zawhna chhángin, leileta kudam sak leh ṭhiah chungchangah leilet neitute nen inremna an siam thu a sawi a, "Leilet neitute nen kan meeting a, an rama kudam awmte chu an ta a nih loh avang leh dan phal loh a ni tih an hriat hnu chuan ṭhiah an pawiti lo," a ti a; lockdown zawh lamah ṭhiat tura hmalak an tum thu a sawi.

Champhai leilet huam chhunga in/kudam sate chu ṭhiat tura hriattir an nih bakah, dan bawhchhiaa leilet an hman avangin sq.m khat zelah Rs. 1,000 chawi tura tih an ni a; pawisa chawi tur chu District Collector office-ah emaw, Land Revenue & Settlement office-ah emaw April 30, 2021 ral hmaa pe tura hriattir an ni.

Leileta kudam sak a nih avanga pawisa chawi tura tih tawh chu an chawitir dawn loh thu sawiin Maria CT Zuali chuan, "Keimahniin kan ṭhiah chuan pawisa a ngai hnem dawn si a, chuvangin, leilet neitute'n pawisa chawi loin anmahni sum séngin an ṭhiat ang a, leilet ramri lungphun (demarcation-boundary pillar) pawh anmahni'n an ti vek bawk ang," a ti.

Tarlan tawh angain, Champhai leilet huam chhunga dan loa sak kudam, kuhva tawlh rûkte dah khawmna nia hriatte leh buh chînna hmun tur, a nihna tur ang ni loa hmante chu November 11, 2020 khan Champhai DC hoin Agriculture department hotute'n an enfiah. Leilet hmun leh a hnaivaia land pass neite enfiah a, a nihna tur ang ni loa hmangte chungah dan anga hmalak an rêl a ni.