Oxygen man lâkin sorkar a timualpho - PC Party

Peoples' Conference (PC) party chuan thu­chhuah siamin, sorkarin oxygen man lak a tum chuan mipui a tihchî-âi bakah, sorkar a tih­mualpho thu an tarlang.

PC party chuan, Mizoram sorkarin sum a neih lohzia lang chiang zel tih sawiin, "Mipui rawng pawh a báwl hlei thei ta lo niin a lang a, a pawi hle. Hripui léngin min tuam a, mipui kan mangan laiin, min tichîâi lehzual turin hmun danga a thlàwna Covid test ṭhin chu man chawi ngaiin kan kalpui a. Tuna oxygen man lak tur a nih thu lo chhuak leh hian min tichîâi lehzual. Ram tan thil lungchhiatthlak tak a ni," an ti.

Ram hruaitute chêt danah inrenchemna hmuh tur a awm lo tih sawiin PC party chuan, "An duhsak zawng an siam theih nan mamawh em em lem loh hna thawh a la tam hle. Tuna kan ram mamawh ber chu, hripui laka invên leh hri kaite enkawl a ni," an ti a; hripui dona lama insáwrbing a, thil danga inrenchem a, ṭul lutuk lo hnathawhte titawp rih a, mipui rawngbawl turin Mizoram sorkar an phût tih an sawi.