Sum renchem kawnga hma la turin ZPM-in Mizoram sorkar an ngen

ZPM party chuan, Covid-19 hripui léng donaah ṭangkaina an nei a nih chuan Mizoram sorkar pui turin an inpeih thu an tarlang a; sum renchem kawnga hma la turin Mizoram sorkar an ngen nghal bawk.

Nimina ZPM thuchhuah chuan, hripui léng mek vanga Mizoram sorkar leh Mizoram mipui harsatnate an hria tih sawiin, "Hemi kawngah hian tih theih kan nei a, ṭangkainate kan nei a nih chuan sorkar pui turin ZPM party kan inpeih. Hri laka kan him tlan nan sorkar thuchhuakte ṭha taka zâwm turin mipui kan ngen a ni," a ti.

ZPM chuan, Health Minister-in Covid-19 léng vanga Mizoram dinhmun May 4, Thawhlehnia a sawi aṭanga a lan danin, sorkar a buaiin a mangang tak zet tih a lang tih an sawi a, "Sum leh páiah harsatna nasa tak sorkarin a tâwk mek tih pawh a hna thawkte sum thawh tura sorkarin a ngenna hian a tilang chiangah kan ngai," a ti a; mi inphalte'n a thlâwna sorkara oxygen an pek, sorkarin man neia a pe chhuak dawn ta pawhin sorkar sum harsatzia a tihchian thu an sawi.

Mizoram sorkarin sum leh paiah harsatna a tawh a, a hnathawkte leh mipui aṭanga sum hmuh dan tur a ngaihtuah mek laiin, sorkarna fawng vuantute chu anmahni lam insuih tê a, sum renchem záwnga inhlân ve ngam turin ZPM chuan sorkar an ngen.

ZPM hian sorkarin SEDP board 14 a din, kum tin cheng nuai za tam tak luan ralna te, Chief Minister-in adviser pahnih a neih mekte chu ennawn a, ṭhiat ngam turin Mizoram sorkar an ngen a; an ṭhiat phal lo a nih pawhin, tuna Mizoram dinhmun mek thlir chunga thla hnih/thum chhung lek pawh chawlh lailâwktir (suspend) ngam turin an ngen bawk.

Chief Minister-in Assembly House-ah, 'Damlo apiangin damdawi-ina an rawn hman theih turin in khat tan nuai hnih thlengin SEDP-ah kan dah,' tia a sawi tawh angin, hripui veite enkawlna senso pawh SEDP aṭanga phuhru turin ZPM chuan sorkar an beisei a; "Department-te hnena Other Charges hnuaia budget allocation a dah cheng vbc. 559 (4.94%) pawh hri léng vanga hnathawh theihna boruak mumal taka a awm hma chu budget re-appropriation/budget cut nei mai turin kan ngen a ni," an ti.